Joǵary oqý oryndaryndaǵy qazaq tildi oqýlyqtar 7 paıyzǵa da jetpeıdi - R.Alshanov
ALMATY. 8 jeltoqsan. QazAqparat /Ádilet Musahaev/ - Elimizdiń kóptegen joǵary oqý oryndary Bolon deklaratsııasyna qol qoıdy.
Bul stýdentterdiń óz betimen jumys isteýine múmkindik beredi. Alaıda oqý ordalarynda qazaq tildi oqýlyqtar tym az. Bul jaıynda búgin JOO qaýymdastyǵynyń prezıdenti Rahman Alshanov Almatyda ótip jatqan joǵary oqý oryndarynyń oqýlyqtary jónindegi respýblıkalyq konferentsııa barysynda aıtty.
R.Alshanov kitaptyń sapasyn bylaı qoıǵanda, kitaptyń ózi de joq ekendigin aıtady. «Elimizdegi qazaq tildi oqýlyqtar 7 paıyzǵa da jetpeıdi. Sondyqtan búgingi basqosýdyń negizgi mindeti - joǵary oqý oryndaryn memlekettik tildegi bazalyq oqýlyqtarmen ári qaraı qamtamasyz etýdegi máselelerdi qaraý», - deıdi R.Alshanov.
«Keıbir JOO-da oqytýshylar kitap jazǵanymen, ol basqa JOO-nyń stýdentterine jete bermeıdi. Sondyqtan byltyr elimiz boıynsha elektrondy kitaphanany iske qosqan edik. Biraq bul óte jaýapkershilikti qajet etedi. Jaqynda qazaq tildi oqýlyqtardy shyǵarýǵa Bilim mınıstrligi birinshi ret 200 mln. teńge bólse, JOO qaýymdastyǵy da qosymsha dál osy mólsherde qarjy bólip otyr»,- deıdi Rahman Alshanov.
