Joǵary oqý oryndaryn oqýlyqpen qamtamasyz etý týraly respýblıkalyq konferentsııa ótedi
ALMATY. 17 qazan. QazAqparat /Erlik Erjanuly/ - Almatyda 20 qazanda Qazaq ulttyq agrarlyq ýnıversıtetiniń májilis-zalynda Qazaqstannyń joǵary oqý oryndaryn oqýlyqpen qamtamasyz etý taqyrybynda VI respýblıkalyq konferentsııa ótedi.
Oǵan QR Bilim jáne ǵylym mınıstri Baqytjan Jumaǵulov jáne joǵary oqý oryndarynyń rektorlary, kitaphana dırektorlary, oqý-ádistemelik bólimderdiń ókilderi men oqýlyq avtorlary qatysady. Sonymen qatar, oqýlyqtary memlekettik tilge aýdarýǵa iriktelip alynǵan shetel avtorlary da shaqyrylyp otyr.
«Byltyr bul konferentsııa 8 jeltoqsanda ótken bolatyn. Onyń sheshimimen, QR Bilim jáne ǵylym mınıstrligi bekitken taqyryptyq jospar boıynsha joǵary oqý oryndaryna 160 myń danamen 130 oqýlyq basyp shyǵarý kózdelgen edi. Qazirgi ýaqytta QR Joǵary oqý oryndary qaýymdastyǵynyń Baspa ortalyǵy tarapynan respýblıkalyq bıýdjet qarjysymen memlekettik tilde 72 bazalyq oqýlyq jaryq kórdi. Qalǵan 60 oqýlyq jyldyń sońyna deıin basylyp, respýblıkanyń joǵary oqý oryndaryna taratylatyn bolady», - deıdi QR Joǵary oqý oryndary qaýymdastyǵynyń aqparattyq-taldaý bóliminiń meńgerýshisi Dına Qojamurat. Onyń aıtýynsha, 400-ge jýyq adam qatysatyn dástúrli konferentsııa kezinde Almaty qalasynyń joǵary oqý oryndary avtorlarynyń úzdik oqýlyqtary men oqý quraldary jınaqtalǵan kórme uıymdastyrylady. Sonymen qatar, QR Ulttyq kitaphanasyna, Ortalyq ǵylymı kitaphanaǵa jáne Almaty oblysynyń Qarasaı aýdandyq kitaphanasyna oqýlyqtardy saltanatty túrde tabys etý rásimi ótedi.
