Joǵary oqý oryndary jastarǵa zamanaýı bilim berýdi qamtamasyz etýi qajet – vıtse-premer

ASTANA. QazAqparat – Akademııalyq artyqshylyq ortalyqtaryn qurýda naqty nátıje joq. Bul týraly QR Premer-Mınıstriniń orynbasary Altaı Kólginov aıtty, dep habarlaıdy QazAqparat tilshisi.

«Kelesi mańyzdy másele – joǵary oqý oryndary jastarǵa zamanaýı bilim berýdi qamtamasyz etýi qajet. Ol úshin ýnıversıtetterdiń qazirgi zamanǵy zerthanalarmen, jańartylǵan kitaphanamen qamtamasyz etilýi jáne oqytýshylardyń biliktiligin únemi arttyryp otyrýy mańyzdy. Osy maqsatta 20 joǵary oqý orny bazasynda Akademııalyq artyqshylyq ortalyqtaryn qurý jumystaryn tııanaqty júrgizýimiz qajet. Bul jumystar 2021 jyly bastalǵanymen áli kúnge deıin naqty nátıje kórmeı otyrmyz. Sebebi mınıstrlik joǵary oqý oryndarymen daıyndyq jumystaryn ýaqytyly pysyqtamaǵan. Osyny jetildirýimiz qajet», - dedi vıtse-premer QR Ǵylym jáne joǵary bilim mınıstrliginiń keńeıtilgen alqa májilisinde.

Onyń atap ótýinshe, 2023 jyly 3 joǵary oqý ornynda Akademııalyq artyqshylyq ortalyǵy ashylatyn bolady.

«Mınıstrlik ýnıversıtet rektorlarymen, Qarjy mınıstrligimen birge basqa ýnıversıtetterde akademııalyq artyqshylyq ortalyqtaryn qurý máselesin birinshi jartyjyldyqtyń sońyna deıin pysyqtaýy tıis», - dedi Altaı Kólginov.