«Joǵary oqý ornynyń úzdik oqytýshysy» ataǵyn berý konkýrsy jarııalandy
ASTANA. QazAqparat - QR Bilim jáne ǵylym mınıstrligi «Joǵary oqý ornynyń úzdik oqytýshysy» ataǵyn berý úshin Qazaqstan Respýblıkasy Bilim jáne ǵylym mınıstriniń buıryǵyna sáıkes konkýrs ótkiziledi.
Konkýrsqa JOO-nyń shtattyq oqytýshylary bolyp tabylatyn jáne baıqaýǵa qujattaryn tapsyrý sátinde keminde bes jyl úzilissiz ǵylymı-pedagogıkalyq ótili bar Qazaqstan Respýblıkasynyń azamattary qatysa alady.
«Joǵary oqý oryndarynyń rektorlary ústimizdegi jylǵy qazanda konkýrstyń joǵary oqý ornyishilik kezeńin ótkizýdi uıymdastyrady, baıqaýdy ótkizý tártibi derbes anyqtalady. Bul rette, sońǵy bes jyldaǵy sapalyq jáne sandyq kórsetkishter negizge alynady»,-delingen QR BǴM málimetinde.
Respýblıkalyq kezeńge konkýrsqa qatysýshylardan qujattardy qabyldaý merzimi 2014 jylǵy 1 qarashadan 21 qarashaǵa deıin ótkiziledi.
