Joǵary oqý ornyna túsý turǵysynda aýyl jastary ádiletsizdikke ushyrap otyr - Q. Aıtahanov
ASTANA. 13 qyrkúıek. QazAqparat - Qala mektepteri men aýyl mektepterin salystyrýǵa kelmeıdi.
Búgin QR Parlamenti Senatynyń jalpy otyrysynda Úkimet basshysynyń atyna depýtattyq saýal joldaǵan senator Qýanysh Aıtahanov osylaı málim etti.
Sóz arasynda depýtat Elbasy N. Nazarbaevtyń tapsyrmasymen elimizde bilim berý sapasyn jaqsartyp, qarqyndy damytýǵa baǵyttalǵan keshendi is-sharalar atqarylyp jatqanyna toqtaldy. Máselen, onyń aıtýynsha, osy salaǵa el bıýdjetinen bólinetin qarajat jalpy ishki ónimniń 5 paıyzyn quraıdy. Júzdegen mektepter men balabaqshalar ashyldy.
«Osy Elbasy alǵa júktegen talaptar turǵysynan alǵanda halqymyzdyń 47 paıyzy turatyn aýyldyq jerlerde bilim berý sapasyn arttyrý áli de kóbirek kóńil bólýdi kerek etedi. Jýyrda, óńirlerge barǵan is-saparymyz barysyndaǵy kezdesýlerde saılaýshylar joǵary bilim alý aýyl jastaryna qol jetimsiz bolyp bara jatqany týraly máseleler kóterdi. Óıtkeni, zamanaýı ınteraktıvtik tehnıkalarmen jabdyqtalǵan, materıaldyq-tehnıkalyq bazasy jaqsy damyǵan qala mektepteri men qarapaıym ınternetke tolyq qosylmaǵan aýyl mektepterindegi bilim berý sapasyn salystyrýǵa kelmeıdi», - deıdi Q. Aıtahanov.
Sonyń saldarynan aýyl túlekteri joǵary oqý oryndaryna túsý kezinde memlekettik grantty jeńip alýda básekege qabiletsiz bolyp otyr. Sondyqtan da, aýyl jastary amal joqtyǵynan aqyly oqý ornyna túsýge májbúr bolýda.
«Al, aqyly oqýdy kez kelgen aýyl balasynyń qaltasy kótere bermeıdi. Alǵashqy jyldary qolyndaǵy malyn satyp bolsa da, balasyn oqytqandy táýir kóretin aýyl turǵandarynyń jyl saıyn qymbattap bara jatqan oqý aqysyn tóleýge shamasy jetpeýge aınaldy. Talaı ǵalym men daryndardyń aýyldan qarapaıym otbasylardan shyqqanyn eskersek, munyń ózi aýyl jastaryna jasalyp otyrǵan ádiletsizdik ekeni sózsiz», - dedi senator Q. Aıtahanov.
