Joǵary nátıje kórsetken memlekettik qyzmetkerler bonýstarmen yntalandyrylady
ASTANA. QazAqparat - «Qazaqstan Respýblıkasynyń memlekettik qyzmeti týraly» Zańyndaǵy túzetýlerge sáıkes, memlekettik qyzmetshilerdiń eńbekaqysy onyń atqarǵan jumysynyń tıimdiligi men nátıjeliligine qatysty bolady. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Saıan Ahmetjanov málim etti.
Eske salaıyq, búgin Parlament Senatynyń jalpy otyrysynda «Qazaqstan Respýblıkasynyń memlekettik qyzmeti týraly» zań jobasy talqylanyp, qabyldanǵan bolatyn. Atap aıtqanda, memlekettik qyzmetkerler úshin nátıjelilik boıynsha eńbekaqy júıesi engiziledi. Bul «birdeı eńbek úshin birdeı eńbekaqy» qaǵıdatyn qamtamasyz etip, osy maqsatta quqyqtyq negiz belgilenedi. «Bul zańda tıimdilik, nátıjelilik jáne maqsatty kórsetkishterge jetý nátıjeleri boıynsha eńbekaqy tóleý jańa júıesiniń tetikteri engizildi. Faktorly-balldyq meje negizinde erekshe nátıje kórsetken memlekettik qyzmetshi jumystyń aýyrlyǵy, jaýapkershilik deńgeıi men maqsatty ındıkatorlarǵa qoljetkizý úlesi úshin bonýstar alady», - dedi S.Ahmetjanov. Aıta keteıik, zańnama aıasynda alǵash ret memlekettik qyzmetke qabyldaý úsh satyly konkýrstyq irikteý arqyly júzege asatyn bolady. Birinshi kezeńde úmitkerler zańdardy bilý men quzyrettilik boıynsha testileýden ótedi. Ekinshi kezeńde agenttik arnaıy suhbattasý arqyly úmitkerdiń jeke qasıetterin tekseredi. Úshinshi kezeńde memlekettik organ kandıdattyń kásibı bilimin, biliktiligin aıqyndaıtyn bolady. Konkýrstan sátti ótkender úshin tálimgerler belgilene otyryp, úshten alty aıǵa deıingi aralyqta synaq merzimi belgilenedi. Synaq merziminen óte almaǵandar agenttiktiń kelisimimen jumystan bosatylýy tıis.
