Joǵary mektepterdiń 200 ustazy «Joǵary oqý ornynyń úzdik oqytýshysy» ataǵyna ıe boldy
ASTANA. 29 jeltoqsan. QazAqparat - QR Bilim jáne ǵylym mınıstri Baqytjan Jumaǵulovtyń tóraǵalyǵymen «Joǵary oqý ornynyń úzdik oqytýshysy» ataǵyn berý jónindegi respýblıkalyq konkýrstyq komıssııanyń otyrysy ótti.
Elimizdiń 57 joǵary oqý ornynyń 200 ustazy «Joǵary oqý ornynyń úzdik oqytýshysy» ataǵyna ıe boldy. Onyń 51% - ǵylym doktorlary, 37,5% - professorlar, qalǵandary - ǵylym kandıdattary, qaýymdastyrylǵan professorlar, dotsentter.
Baıqaýǵa 97 joǵary oqý ornynan, onyń ishinde 49 memlekettik jáne 48 jekemenshik joǵary oqý oryndarynan 500-den astam ótinim tústi. Konkýs joǵary oqý oryndarynyń 70% qamtydy.
Bıyl baıqaý eki kezeńnen turdy. Bul respýblıkalyq konkýrsqa úmitkerlerdi aıqyndaýda joǵary oqý oryndarynyń jaýapkershiligin arttyrdy. Ekinshi kezeńde elektrondyq aıqyndaý barysynda 500 úmitkerdiń ustazdyq qyzmetiniń úzdik nátıjelerin kórsetken 200 úmitker tańdap alyndy.
Konkýrs jeńimpazdarynyń 50 paıyzy ǵylymnyń kókeıkesti: fızıka-matematıka, bıologııa, medıtsına, hımııa ǵylymdary salalarynan. Al 31 adam pedagogıkalyq ǵylym salasynan.
Bul grant joǵary oqý ornynyń oqytýshylaryna álemniń Ulybrıtanııa, Germanııa, Frantsııa, Italııa, Ispanııa, Belgııa, Polsha, Chehııa, Vengrııa, Shvetsııa, Avstrııa, Bolgarııa, Lıtva, Latvııa, Reseı jánebasqa da elderdiń úzdik joǵary oqý oryndarynda tájirıbeden ótýge múmkindik bermek.
Budan basqa grant ıegerleri bir jyl ishinde halyqaralyq, respýblıkalyq ǵylymı konferentsııalardyń, sımpozıýmdardyń, kongressterdiń, ǵylymı zertteý taqyryby jáne oqý protsesin uıymdastyrý máseleleri boıynsha semınarlardyń jumystaryna qatysa alady.
