Joǵary mamandandyrylǵan medıtsınalyq kómek kólemi 60 paıyzǵa artty

Bul týraly búgin Parlament Májilisindegi Úkimet saǵatynda Densaýlyq saqtaý mınıstri Salıdat Qaıyrbekova málim etti.

Mınıstrdiń aıtýynsha, Biryńǵaı Ulttyq densaýlyq saqtaý júıesin damytý sheńberinde qala jáne aýyl turǵyndary úshin qoljetimdi joǵary tehnologııalardy damytýǵa jaǵdaılar jasalǵan. Máselen, joǵary mamandandyrylǵan medıtsınalyq kómek kólemi 2011 jylmen salystyrǵanda 60 paıyzǵa artsa, olardyń jartysynan astamy óńirlerde kórsetilgen. «2012 jyly alǵash ret statsıonarlyq kómek kórsetetin mamandardy oqytýǵa arnalǵan qarajat tegin medıtsınalyq kómektiń kepildik berilgen kólemi tarıfine engizilgen. Bul emdeý mekemeleriniń jetekshilerine óz mamandaryn qaıda jáne qandaı taqyrypta oqytý týraly sheshimdi ózderiniń qabyldaýyna múmkindik berdi. Ótken jyly osy júıemen 12 myńnan asa maman oqyp shyqty», - dedi S. Qaıyrbekova.

Budan bólek, mınıstr tehnologııalardy transfertteý úshin shetelderden úzdik mamandardy shaqyrý arqyly 73 sheberlik synyptary ótkizilgenin atap ótti. «Nátıjesinde azamattar buryndary 20-dan astam aýrý túrleri boıynsha shetelderge emdeýge jiberiletin bolsa, qazir olardyń sany 8-di ǵana quraıdy», - deıdi mınıstr Salıdat Qaıyrbekova.