Joǵary ınflıatsııanyń saldary áleýmettik baǵdarlamalarǵa zııanyn tıgizedi - Q.Kelimbetov
ANA. 10 mamyr. QazAqparat /Marlan Jıembaı/ - Joǵary ınflıatsııanyń saldary áleýmettik baǵdarlamalarǵa zııanyn tıgizedi. Bul týraly búgin Úkimet otyrysynda QR Ekonomıkalyq damý jáne saýda mınıstri Qaırat Kelimbetov aıtty.
Іshki jaǵdaılardyń kóbinese syrtqy faktorlarǵa táýeldi bolatyndyǵyn basa aıtqan ol: «Al biz, syrtqy faktorlarǵa yqpal ete almaıtyn bolsaq, onda ekonomıkalyq belsendiliktiń ósýine yqpalyn tıgizetin ekonomıkanyń ishinde jaǵdaılar jasaý qajet. Osy turǵydan alǵanda ınflıatsııanyń ósýine jol bermeý birinshi kezektegi mindet bolyp tabylady. Joǵary ınflıatsııa sheteldik ınvestıtsııalardy tartýǵa, óndiristerdiń keńeıýi men kapıtaldyń jınaqtalýy úshin qajet qaryz resýrstarynyń qunyn tómendetýge múmkindik bermeıdi. Budan basqa, joǵary ınflıatsııanyń saldary áleýmettik baǵdarlamalarǵa zııanyn tıgizedi», - dedi.
Onyń paıymynsha, aǵymdaǵy jyl ınflıatsııalyq úrdisterdiń údeıe túsýi turǵysynan alyp qaraǵanda ásirese qaýipti bolyp kórinedi. Inflıatsııanyń jyl basynan bergi serpini osyny qýattap otyr.
«Aǵymdaǵy jyldyń qańtar-aqpanynda tutyný taýarlary men qyzmetterge baǵalar ótken jyldyń jeltoqsanyna qaraǵanda 4,2 paıyzǵa ósti, bul ótken jyldyń tıisti kezeńi kórsetkishinen 0,6 paıyzdyq tarmaqqa joǵary. Jyldyq mándegi (2011 jyldyń sáýiri 2010 jylǵy sáýirge qaraǵanda) ınflıatsııa deńgeıi 8,4 paıyzdy qurady», - dedi Q.Kelimbetov.
