Joǵary hokkeı lıgasy: Qazaqstannyń eki komandasy bir-birine qarsy shyǵady
ASTANA. 3 qarasha. QazAqparat - Búgin Qaraǵandy qalasynda Joǵary hokkeı lıgasynda óner kórsetip júrgen eki qazaqstandyq ujym - «Saryarqa» men «Qaztsınk-Torpedo» komandalary arasyndaǵy oıyn ótedi.
«Qaztsınk-Torpedonyń» bıylǵy chempıonatty sátti bastaǵanyn erekshe atap ótken jón. Óskemen qalasynyń hokkeı klýby birneshe oıynda qatarynan jeńiske jetip, lıganyń jalpytýrnırlik kestesiniń kósh basyna da shyqqan. Biraq sońǵy úsh matchta utylyp, tórtinshi orynǵa syrǵyp tústi. Al ótken chempıonattyń fınalyna deıin jetken «Saryarqa» úshin bul chempıonat basqasha órbidi. Qaraǵandy qalasynyń hokkeı klýby birneshe ret utylyp, eń sońǵy orynda aýtsaıder bolyp ta tanylǵan. Degenmen, birte-birte kúsh jınap, tómennen joǵary qaraı kóterile bastady. Oǵan qosa, jaqynda klýbtyń bas bapkeri aýysty. Ol qyzmetke slovak mamany Dýshan Gregor keldi. Onyń jetekshiligimen «Saryarqa» sońǵy eki oıynda jeńiske jetti. Qazir komanda 29 upaımen jalpytýrnırlik kestede 10-shy orynda keledi.
Aıta keteıik, Qurlyqtyq hokkeı lıgasynda Qazaqstannyń atynan bir komanda oınap júr. Ol - Astana qalasynyń «Barys» hokkeı klýby. Al Joǵary hokkeı lıgasynda eki qazaqstandyq ujym - «Saryarqa» men «Qaztsınk-Torpedo» óner kórsetedi. Eki komanda arasyndaǵy oıyn búgin Astana ýaqyty boıynsha saǵat 14:00-de bastalady.
