Joǵary bilimi joq adam aýyl ákimi bola ala ma
ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttigi aýyl ákimi qyzmetine joǵary bilimi joq adamdardyń taǵaıyndalýy saıası turǵyda qısynsyz ekenin aıtty, dep habarlaıdy QazAqparat.
«Keıbir jergilikti atqarýshy organdar tarapynan aýyl men kent ákimderiniń bilim deńgeıi boıynsha biliktilik kórsetkishin tómendetý múmkindigi máselesi kóterilýde. «Joǵary bilimi bolmasa da, kásibı-tehnıkalyq oqý orny jetkilikti me» degen saýal qoıylýda. Biz qazirgi kezde reformany iske asyrdyq, ıaǵnı kásibı memlekettik apparatty qalyptastyrý jumystary atqaryldy. Bul turǵyda Eýropalyq odaq ta Qazaqstanda kásibı memlekettik apparat qurylǵanyn moıyndap otyr. Sondyqtan tórtinshi deńgeıdegi bıýdjetpen aınalysatyn ákimder úshin bilim deńgeıi boıynsha kórsetkishti tómendetý negizsiz ári saıası qısynsyz bolady», - dedi Memlekettik qyzmet isteri jáne sybaılas jemqorlyqqa qarsy is-qımyl agenttiginiń apparat basshysy Saıan Ahmetjanov Senatta ótken otyrysta.
Budan buryn habarlanǵandaı, búgin Senat depýtattary men jaýapty mınıstrlikter ókilderi, sondaı-aq óńir ákimdikteri mamandarynyń qatysýymen jergilikti memlekettik basqarý júıesin jetildirý taqyryby talqylandy. Onda QR Qoǵamdyq damý vıtse-mınıstri Sergeı Konovalov qoǵamdyq keńester quramyndaǵy keıbir músheler ózderiniń mindetterin laıyqty deńgeıde atqarmaıtynyn aıtty.
