Joǵary bilim uıymdary oqytýshylarynyń kásiptik standarty ázirlenip jatyr

ASTANA. QazAqparat – Joǵary bilim uıymdary oqytýshylarynyń kásiptik standarty ázirlenip jatyr. Bul jaıynda Májilis depýtattarynyń saýalyna Úkimet basshysy Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Ǵylym jáne joǵary bilim mınıstrliginiń jumys toby jańartylǵan pedagogıkalyq quzirettermen «Pedagogıkalyq joǵary jáne joǵary oqý ornynan keıingi bilim uıymdary oqytýshylarynyń» kásiptik standartyn ázirlep jatyr. Oqý-aǵartý mınıstrligi pedagogterdiń biliktiligin arttyrýda biryńǵaı ádisti qamtamasyz etý úshin tıisti uıymdar men bilim berý baǵdarlamalaryna saraptama júrgizip jatyr», - dep atap ótedi Álıhan Smaıylov jaýabynda.

Premer-Mınıstrdiń atap ótýinshe, 2022 jyly Oqý-aǵartý mınıstrligimen kelisilgen 181 bilim berý baǵdarlamasynyń 47-sin jekemenshik bilim berý uıymdary júzege asyrýda.

«Búginde pedagogterdi kýrstyq daıyndaýdy júzege asyratyn uıymdarǵa bekitilgen talaptarǵa 30 uıym saı keledi. Onyń 19-y - jekemenshik», - dedi Úkimet basshysy.