Joǵary bilim bızneske aınalmaýy kerek – Talǵat Nárikbaev

NUR-SULTAN. QazAqparat – Joǵary bilim bızneske aınalmaýy kerek. Stýdentterdiń bilimi men tájirıbesin olardyń aqshalary esebinen damytý múmkin emes. Qazaqstan stýdentteri Alıansy múshelerimen jáne 100-den astam joǵary oqý oryndarynyń belsendi jastarymen onlaın kezdesýinde KAZGUU ýnıversıtetiniń Basqarma tóraǵasy Talǵat Nárikbaev osyndaı pikir bildirdi, dep habarlaıdy QazAqparat.

«Menińshe, stýdent joǵary bilim úshin aqsha tólemeýi tıis. Osy ýaqytqa deıin Eýropada joǵary bilim aqysy arzan bolǵanyna tańǵalatyn edik. Mysaly Ispanııada stýdentter jylyna bir myń evro tóleıdi. Qazaqstandyq keıbir joǵary oqý oryndarynda oqý aqysy odan áldeqaıda qymbat. Ispanııalyq rektordan oqytýshylarynyń jalaqysyn suraǵanymda, aıyna 4-5 myń evro alatynyn aıtty. Óıtkeni memleket oqý oryndaryn tikeleı qarjylandyryp, aılyqty da ózi tóleıdi. Sondyqtan olar qosymsha shyǵyndaryn óteý úshin ǵana stýdentten jylyna 1 myń evro alady», - dep túsindirdi KAZGUU ýnıversıtetiniń Basqarma tóraǵasy Talǵat Nárikbaev.

Onyń aıtýynsha, qazaqstandyq joǵary oqý oryndary stýdentke klıent retinde qaraıdy. Shyn mánisinde, ýnıversıtettiń klıenti stýdent emes – jumys berýshi. Óıtkeni naryqta jumys berýshige sapaly bilim alyp shyqqan, básekege qabiletti mamandar qajet.

«Meniń oıymsha, joǵary bilim bızneske aınalmaýy kerek. Stýdent joǵary bilim úshin aqsha tólemeýi tıis. Ýnıversıtet negizinen halqyna, eline qyzmet etýi shart. Ýnıversıtet - kommertsııalyq emes, áleýmet aldyndaǵy jaýapkershiligi bar uıym. Stýdentterdiń bilimi men tájirıbesin olardyń aqshalary esebinen damytý múmkin emes. Sebebi sapaly bilim berýdi uıymdastyrýda az qarajat jumsalmaıdy. Sondyqtan bilim sapasyn arttyrǵymyz kelse, oqytýshylardyń jalaqysyn memleket tikeleı qarjylandyrýy kerek (Ispanııa, Germanııa nemese Nıderlandydaǵydaı), al ýnıversıtet qarjylandyrýdyń basqa kózderin qarastyrýy qajet» - deıdi Basqarma tóraǵasy.