Joǵary bilim alýǵa alǵashqy qadam sapaly bilim beretin mektepte jasalady - B. Baıbek
ALMATY. QazAqparat - Joǵary bilim alýǵa alǵashqy qadam sapaly bilim beretin mektepte jasalady. Bul týraly búgin Almaty qalasy Naýryzbaı aýdanynyń Qalqaman-2 yqshamaýdanynda hımııa-bıologııa baǵytynda oqytatyn Nazarbaev Zııatkerlik mektebiniń ashylý saltanatynda Almaty qalasynyń ákimi Baýyrjan Baıbek málimdedi.
«Almaty - táýelsizdiktiń altyn besigi. Elbasy Almaty qalasynyń ósip-órkendeýine aıryqsha kóńil bólip keledi. Sondyqtan búgin Almatyda osymen ekinshi Nazarbaev zııatkerlik mektebiniń ashylýy osynyń aıqyn dáleli bola alady. Joǵary bilim alýǵa alǵashqy qadam balabaqsha men sapaly bilim beretin mektepte jasalady desek, balalarǵa sapaly orta bilim berý úlken mańyzǵa ıe. Ol úshin ustazdarǵa úlken jaýapkershilik júkteledi. Bul mektepte muǵalimderdiń jalaqysy basqa mektepterge qaraǵanda kem degende eki ese joǵary. Ustazdar qaýymy mektepke baıqaý arqyly qabyldandy. Bir orynǵa 8 adamnan keldi. Sondaı-aq, oqýshylar arasynda da bir orynǵa 8 bala úmitker boldy. Bul túsinikti de. Óıtkeni, mektep zamanaýı tehnologııalarmen jabdyqtalǵan. Munda joǵary sapaly bilim beriledi jáne mundaǵy zamanaýı tehnologııalyq jabdyqtar tipti batys elderinde de joq», - dedi qala ákimi.
Atap aıtqandaı, Almaty qalasyndaǵy hımııa-bıologııa baǵytynda oqytatyn Nazarbaev Zııatkerlik mektebi 960 oqýshyǵa arnalyp salynǵan. 9 bloktan turatyn bilim ordasynda sońǵy úlgidegi mektep jabdyqtarymen jabdyqtalǵan 70 oqý synyby men 25 zerthana ornalasqan. Úsh zaldan turatyn mektep kitaphanasyn da erekshe atap ótýge bolady. Kitaphana qory oqý-ádistemelik quraldar, klassıkalyq jáne kórkem ádebıetter, otandyq basylymdar jáne medıatekamen tolyqtyrylǵan. Kitaphana oqýshylar izdenis, aqparattardy taldaý jumystaryn júrgize alatyn aqparattyq ortalyq retinde qarastyrylǵan.
Sonymen qatar, mekteptegi sporttyq blokta úlken jáne kishi sport zaldary, jattyǵý zaly jáne horeografııa zaly bar. Mektep alańynda fýtbol, basketbol jáne voleıbol oıyndaryna arnalǵan alańqaılar, tennıs, jeńil atletıka alańdary jáne balalardyń demalys aımaǵynan turatyn zamanaýı sport kesheni ornalasqan.
Keń ári kóp fýnktsııaly 480 oryndyq akt zaly, 100 oryndyq dárishana jáne 50 oryndyq konferentsııa zaly mektepte túrli is-sharalardy ótkizýge arnalǵan.
Oqýshylar aldaǵy oqý jylynan bastap, 500 oryndyq 2 úlken ashanada tamaqtanatyn bolady.
Al jataqhana korpýsy Almaty qalasyndaǵy eki Zııatkerlik mekteptiń 270 oqýshysyn qamtıdy.
Endi, bul mektepte Qazaqstan Respýblıkasynyń Tuńǵysh Prezıdentiniń «Órken» bilim grantynyń 790 ıegeri bilim alatyn bolady. Konkýrstan ótken 7-8 synyp oqýshylarynyń ortasha baly - 819-646 aralyǵynda bolsa (eń joǵary ball - 1000), 9-10 synyp oqýshylarynyń jınaǵan ortasha baly 28,6-23,4 aralyǵynda boldy (eń joǵary ball - 60).
Nazarbaev Zııatkerlik mektebiniń oqýshylaryna baıqaýdan iriktelip alynǵan 140 úzdik muǵalim sabaq júrgizedi.
Sonymen qatar, bul mektep joǵary oqý oryndarymen tyǵyz baılanysta jumys atqaratyn bolady. Taǵy bir aıta ketetin jáıt, mektepte ǵalymdar men muǵalimderdiń birlesken «Ǵylym álemin ashamyz!» jobasy iske asyrylady. Bul joba oqýshylardyń ónertapqyshtyq jáne zertteýshilik daǵdylaryn qalyptastyryp, bolashaq jas ǵalymdarǵa ózindik jeke ǵylymı jobalaryn jasaýǵa baǵyt beredi.
