Joǵary bilikti mamandarǵa qajettilik bolǵanymen JOO bitirýshilerine suranys tómen - G.Ábdiqalyqova
ASTANA. QazAqparat - Jumys berýshiler tarapynan joǵary bilikti mamandarǵa qajettilik bolǵanymen joǵary oqý oryndarynyń bitirýshilerine suranys tómengi deńgeıde qalyptasyp otyr. Búgin QR Parlamenti Májilisindegi «Tehnıkalyq jáne kásiptik, joǵary bilim berý júıesinde ekonomıka salalary úshin kadrlar daıarlaýdyń sapasy men perspektıvalary týraly» parlamenttik tyńdaý barysynda QR Premer-Mınıstriniń orynbasary Gúlshara Ábdiqalyqova osylaı dep aıtty.
«Qazirgi tańda eńbek naryǵynda eńbek resýrstaryndaǵy suranys pen usynystyń arasynda úılespeýshilik oryn alyp otyr. Jumys berýshiler tarapynan joǵary bilikti mamandarǵa degen qajettilik bola tura kolledjder men joǵary oqý oryndaryn bitirýshilerge suranys tómengi deńgeıde qalyptasýda. Onyń basty sebebi - kadrlar daıarlaý júıesiniń mazmuny men bıznes talaptarynyń arasyndaǵy alshaqtyqta», - dedi ol.
Onyń atap ótýinshe, bul kóbinese mamandar daıarlaý júıesiniń kásiporyndar suranysyna emes bilim berý ınfraqurylmynyń múmkindigine baǵyttalýyna baılanysty oryn alýda.
«Qazirgi ýaqytta Úkimet ekonomıka salalary boıynsha eńbek resýrstaryna degen suranysty jan-jaqty zertteýde. Kadrlar daıarlaý júıesi eńbek naryǵynyń qajettilikterine sáıkes qatysýshy barlyq sýbektiler ózara tyǵyz baılanysy arqyly jańǵyrtylyp otyrady», - dedi G.Ábdiqalyqova.
