Joǵary bilikti ІT-mamandar daıarlaýǵa granttar sanyn arttyrý kerek - T. Qulybaev
Palatanyń Aqparattyq-kommýnıkatsııalyq tehnologııalar jáne «jasyl ekonomıka» komıtetiniń tóraǵasy Shavqat Sabyrovtyń aıtýynsha, 2015 jyly aqparattyq-kommýnıkatsııalyq tehnologııalardy damytý salasyna jumsalǵan jalpy shyǵystar 375,6 mlrd. teńgeni quraǵan. Bul rette komıtet basshysy aqparattandyrý salasynyń ýákiletti organymen yntymaqtastyqty arttyrý, AKT-salasynyń halyqaralyq qatysýshylaryn tartý, olardyń bıznesin elimizde zańdastyrý máselesine nazar aýdaryp ótti.
Sonymen qatar, sarapshylar ІT-mamandaryn daıarlaý, olardyń eńbek naryǵyndaǵy suranysy máselelerin talqylady. Sarapshylardyń pikirinshe, qazirgi tańda Almaty qalasyndaǵy eki joǵary oqý ornynda jyl saıyn 2 myńǵa tarta ІT salasynyń mamandary daıarlanady. Al «Sandyq Qazaqstan» baǵdarlamasy boıynsha elimizde eń kemi 60 myńǵa tarta maman qajet.
Jıyndy qorytyndylaǵan «Atameken» UPP Tóralqa Tóraǵasy Tımýr Qulybaev búgingi tańda naryqqa qandaı da bir tyıymdar salý múmkin emes ekenin ári durys emes ekenin atap ótti. «Bul saladaǵy kez kelgen tyıymdar ádil emes básekelestikti kórsetedi, bul jahandyq naryq sharttaryna da qaıshy. Onyń ornyna qazirgi kúni suranysqa ıe ónim shyǵarýdy úırený kerek. Bul rette eger barlyq talaptarǵa saı kelip tursa memlekettik organdar otandyq dúnıelerden bas tartady dep oılamaımyn. Sonymen qatar, bilim salasynda ІT mamandary boıynsha granttardy arttyrý jastardy joǵary tehnologııalar salasyna belsendi aralasýǵa járdemdesedi dep oılaımyn», - dedi Tımýr Qulybaev.
Aıta keterligi, Qazaqstannyń aqparattyq ortasy básekelestik, ashyq jáne lıberaldy naryq qurý kezeńin bastan ótkerýde. Búgingi tańdaǵy málimetterge qaraǵanda, elimizdiń aqparattyq-kommýnıkatsııalyq tehnologııalar salasynda ekonomıkaǵa tartylǵan jalpy halyqtyń 1,5%-y (131,9 myń adam) jumyspen qamtylǵan. Bul saladaǵy jumys istep turǵan shaǵyn jáne orta bıznes sany: zańdy tulǵalar - 5601; jeke kásipkerler - 11065. Tirkelgen kásipkerlerdiń negizgi bóligi Almaty - 38,8% jáne Astana - 20,1% qalalarynda shoǵyrlanǵan.