Joǵary aýdıtorlyq palata jylýmen jabdyqtaý salasynda qarajatty tıimsiz ıgerý derekterin anyqtady
Bul týraly Májilistiń jalpy otyrysynda jylýmen jabdyqtaý salasyndaǵy aýdıtorlyq is-sharanyń qorytyndysyn talqylaý kezinde Joǵary aýdıtorlyq palata tóraǵasy Natalıa Godýnova aıtty, dep habarlaıdy QazAqparat tilshisi.
«Memleket basshysynyń tapsyrmasy boıynsha 2022-2023 jylǵy jylytý maýsymynda birqatar óńirde bolǵan shtattan tys jáne tipti tótenshe jaǵdaıǵa baılanysty, Joǵary aýdıtorlyq palata tekserý komıssııalarymen birge jylýmen jabdyqtaý salasyndaǵy basqarý tıimdiligine memlekettik aýdıt júrgizdi. 47 memlekettik mekemede jáne 44 tabıǵı monopolııa sýbektisinde aýdıt júrgizildi. 140 mlrd teńgeden astam bıýdjet qarajatynyń jáne 480 mlrd teńge aktıvterdiń ıgerilý tıimdiligi tekserildi», - dedi N. Godýnova.
Onyń aıtýynsha, osynyń nátıjesinde 23 mlrd teńge somasynda qarjy salasyndaǵy zańsyzdyq, 37 mlrd teńgege bıýdjet qarajatyn tıimsiz josparlaý, 117 mlrd teńgege ekonomıkalyq shyǵyndar men paıdadan qaǵylý derekteri anyqtaldy.
«Jalpy, 2020-2022 jyldar aralyǵynda jylýmen jabdyqtaý obektilerin salýǵa, rekonstrýktsııalaýǵa jáne jóndeýge 250 mlrd teńge, sonyń ishinde respýblıkalyq bıýdjetten 84 mlrd teńge bólingen. Alaıda, búginde resýrstardyń az bolýy jylý-energetıka júıesiniń qajet qoryn jáne apatsyz jumys isteýin qamtamasyz etpeıtini bárine túsinikti. Buǵan jylý elektr ortalyqtarynyń negizgi jabdyqtarynyń orta eseppen elimiz boıynsha 66 paıyzynyń tozýy jáne jylý jelileriniń 54 paıyzynyń tozýy dálel bola alady», - dedi palata basshysy.
Onyń sózine qaraǵanda, jylý elektr ortalyqtarynyń jalpy sanynyń 76 paıyzy 50 jyldan astam, 24 paıyzy 30 jyldan astam paıdalanylyp keledi. Jylý elektr ortalyqtarynyń ortasha qyzmet etý merzimi — 61 jyl.
«Olardyń apat jaǵdaıynda toqtap qalýy jyl saıyn artyp keledi. 2020 jylmen salystyrǵanda, 2021 jyly jylý elektr ortalyqtaryndaǵy osyndaı oqıǵalar 22 paıyzǵa ósken. Memlekettik komıssııa tapsyrmasy boıynsha Energetıka mınıstrligi barlyq obektige tehnıkalyq aýdıt júrgizdi», - dedi N. Godýnova.
