Joǵary aýdıtorlyq palata «Jaıly mektep» jobasyn júzege asyrý tártibin synady
«Respýblıkalyq bıýdjetten jáne Ulttyq qordan bólingen qarajatqa toqtalsaq, belgilengen maqsatty ýaqytyly oryndaý turǵysynda basshylardyń jaýapkershiligi tıisti deńgeıde emes dep sanaımyz. Óńirlerge aýdarylǵan jalpy transfertterdiń kólemi ósti. Eger resýrstardy baǵyttasaq, onda osy qarajatqa qatysty tıisti jaýapkershilik te bolýy kerek», - dedi N. Godýnova.
Onyń aıtýynsha, mınıstrlik maqsatty transfertterdi óńirlerge aýdara otyryp, qarajatty ıgerý baǵytyndaǵy nátıje boıynsha ózin jaýapkershilikten bosatqan.
«Óńirler boıynsha jobalaý-smetalyq qujattamany ázirleý turǵysynda salalyq mınıstrlikterdiń monıtorıngi is júzinde qarastyrylmaǵan. Bul rette áleýmettik nysandardyń jabdyqtarmen qamtamasyz etilýine baǵalaý júrgizilmeıdi. Aımaqtarǵa aqsha berildi, alaıda odan keıingi másele baqylaýsyz qalyp otyr. Osynyń saldarynan sapasyz salynǵan mektep jáne basqa nysyndar jaıynda problema bolyp jatady», - dedi palata basshysy.
Onyń sózine qaraǵanda, zańnamalyq deńgeıde bıýdjettik ınvestıtsııalyq jobalardy iske asyrýǵa qatysty ortalyq memlekettik organdardyń basshylary men bıýdjet qarajatyn ıgeretin óńirlerdegi basshylardyń jaýapkershiligin engizý qajet.
«Byltyr Oqý-aǵartý mınıstrligi qurylys salasy ózderiniń profıline jatpaıdy degen jeleýmen «Jaıly mektep» jobasyn júzege asyrýdan bas tartty. Nátıjesinde jobany Samruk-Kazyna Construction júzege asyryp jatyr. Degenmen, memlekettik satyp alý erejeleri saqtalmaýy múmkin degen kúdik bar. Bul baǵytta qomaqty qarajat, ıaǵnı 2,6 trln teńge bólindi. Atap aıtqanda, bul saladaǵy is-qımyldarǵa qatysty tıisti suraqtar paıda boldy», - dedi Natalıa Godýnova.
Aıta keteıik, Samruk-Kazyna Construction aktsıonerlik qoǵamy «Jaıly mektep» ulttyq jobasynyń nysanaly qurylys dırektsııasy bolyp otyr. Ulttyq joba aıasynda 2025 jyldyń aıaǵyna deıin Qazaqstan boıynsha 401 jańa zamanaýı mektep salý kózdelgen.
