Joǵary aýdıtorlyq palata salyqtyq jeńildikter qoldanýdaǵy kemshilikterdi atady
«Prezıdent salyqtyq jeńildikterdi qoldaný jappaı daǵdyǵa aınalǵanyn atap ótti. Ótken jyldyń sońynda Joǵary aýdıtorlyq palata salyqtyq jeńildikter bóliginde memlekettik organdar qyzmetine jáne olardyń salyqtyq ákimshilendirýleri tıimdiligine aýdıt júrgizdi. Aýdıt júrgizý barysynda salyqtyq jeńildikterge qatysty aıtarlyqtaı problemalardy bar ekendigi anyqtaldy. Atap aıtqanda, zańnamada olardy aıqyndaýdyń naqty ólshemsharttary joq. Sondyqtan, salyqtyq jeńildikterdiń naqty tizilimin aıqyndaý múmkin emes», - dedi ol Senatta «Salyqtyq jeńildikteri ońtaılandyrý jáne olardyń tıimdiligin arttyrý» taqyrybyndaǵy dóńgelek ústel barysynda.
Onyń atap ótýinshe, salyq saıasatyna jaýap beretin Ulttyq ekonomıka mınıstrligi men salyqtyq jeńildikter qoldanýdy júzege asyratyn Qarjy mınıstrliginiń Memlekettik kirister komıteti arasynda salyqtyq jeńildikter nátıjesindegi shyǵyn somasynda aıyrmashylyq bar. Máselen, Ulttyq ekonomıka mınıstrligi memlekettik qarjylardy basqarý tujyrymdamasynda 2018-2020 jyldardaǵy shyǵyn somasyn 13 trln teńge dep kórsetken. Al, Memlekettik kirister komıteti dereginshe, shyǵyn somasy – 17,5 trln teńge.
«Buǵan qosa, Joǵary aýdıtorlyq palata salyq zańnamasy jaǵdaıyna baǵa berdi jáne salyqtyq jeńildikter tizilimin jasady. Nátıjesinde, 64 salyqtyq jeńildikti Ulttyq ekonomıka mınıstrligi de, Memlekettik kirister komıteti de baǵalamaıtyndyǵy anyqtaldy. Sondyqtan, bizdiń esepteýmiz boıynsha atalǵan kezeńdegi salyqtyq jeńildikterden kelgen bıýdjet shyǵystary 21 trln teńgeden asyp túsedi», - dedi Ardaq Teńgebaev.
