Kórshilerdiń kesirinen páterińizdi sý bassa ne isteý kerek
PETROPAVL. KAZINFORM — Kópqabatty úıde turatyndar jıi tap bolatyn máselelerdiń biri — joǵary qabattaǵy kórshilerdiń salǵyrttyǵynan nemese apattyq jaǵdaıdan páterdi sý basýy. Mundaıda múlkińizge zalal kelýi múmkin. Osyndaı keleńsiz jaǵdaıda ne isteý qajet?
Advokat Olga Gavrık jiktep berdi:
Birinshi kezekte — qaýipsizdikti qamtamasyz etý
Eń aldymen, sýdy toqtatý úshin barlyq qajetti sharany qoldaný kerek, ıaǵnı kórshilerge habarlasý, sýmen jabdyqtaýdy ýaqytsha toqtatý nemese apatty qyzmetti shaqyrý qajet.
Kelesi qadam — zalaldy qujat júzinde tirkeý
Kórshiler shyǵynnyń ornyn toltyramyz dep ýáde berse de, zańdy jolmen áreket etý mańyzdy. Sebebi bul jaǵdaı sotqa deıin barýy yqtımal. Ol úshin:
Páter ıeleri kooperatıvi (PIK) nemese múlik ıeleri birlestigi (MIB) tóraǵasyn, eger olar bolmasa, apatty qyzmetti, kórshiler men sý aqqan páterdiń ıesin shaqyryp, sý basý aktisin rásimdeńiz;
Aktte tekserý júrgizilgen mekenjaıdy, ýaqyty men qatysýshylardyń tolyq málimetterin jáne baılanys nómirlerin kórsetińiz;
Sý basqan jerler men búlingen múlikti naqty sıpattap jazyńyz;
Foto jáne vıdeo túsirilim júrgizip, dálel retinde saqtańyz;
Aktke barlyq qatysýshy qol qoıýy tıis, sonyń ishinde sý aqqan páterdiń ıesi de;
Eger páter ıesi qol qoıýdan bas tartsa, bul týraly aktide jazbasha kórsetiledi.
Páter jalǵa berilgen bolsa she?
Eger sý aqqan páterde jalǵa alýshylar turyp jatsa, páter ıesimen baılanysyp, aktini sonyń qatysýymen rásimdeý qajet. Baılanys derekteri bolmaǵan jaǵdaıda, ýchaskelik polıtseıge júginý arqyly ıesin tabýǵa bolady.
Zalaldy baǵalaý jáne ótemaqy óndirý
Kelesi qadam — táýelsiz baǵalaýshy mamandy shaqyryp, materıaldyq shyǵyn kólemin anyqtaý. Bul qyzmet aqyly, biraq baǵalaýshynyń bergen esebi men chegin sotqa dálel retinde usynýǵa bolady.
Sodan keıin kórshige sotqa deıingi shaǵym jiberip, barlyq dáleldi qosa tirkep, belgili bir merzim ishinde zalaldy óteýin surańyz.
Sot arqyly óndirip alý
Eger kórshi belgilengen merzimde jaýap bermese nemese ótemaqy tóleýden bas tartsa, sotqa ózińiz, ne advokat, zańgerdiń kómegimen júginýge týra keledi. Sotqa talap aryzben birge mynadaı qujattardy:
Páterdiń menshik qujatyn;
Páterdi sý basý aktisin;
Rastaıtyn foto jáne vıdeo materıaldardy;
Kýágerlerdiń anketalyq málimetterin;
Shyǵyndardy rastaıtyn chekter men baǵalaý qorytyndysyn qosa tapsyrý kerek.
Advokattyń aıtýynsha, zalal keltirilgen kúnnen bastap, 3 jylǵa deıin sotqa júginýge bolady.
Buǵan deıin alaıaqtar atyńyzdan nesıe rásimdese ne isteý kerektigin jazǵan edik.