Joǵary sot keńesiniń quramy qaıta qaralýy múmkin - sýdıalar sezi
ASTANA. KAZINFORM – Sýdıalardy irikteýdiń obektıvtiligin qamtamasyz etý úshin Joǵary sot keńesiniń quramyn qaıta qaraý kerek. Bul týraly Qazaqstan sýdıalarynyń sezinde QR Prezıdenti Qasym-Jomart Toqaev málim etti.
Memleket basshysynyń aıtýynsha, Joǵary sot keńesi derbes ári kásibı sýdıalar korpýsyn qalyptastyrýdyń kepili bolýy tıis.
«Dál osy maqsatta 2021 jyly Joǵary sot keńesinen Ádilet mınıstri, Memlekettik qyzmet isteri agenttiginiń basshysy shyǵaryldy. Endi, ary qaraı osy jumysty jalǵastyrý kerek, ıaǵnı sýdıalardy irikteýdegi tolyq protsestiń obektıvtiligin qamtamasyz etý úshin Joǵary sot keńesiniń quramyn qaıta qaraý kerek», - dedi Qasym-Jomart Toqaev.
Prezıdenttiń sózine qaraǵanda, halyqaralyq tájirıbede osyndaı organdarda prokýratýra ókilderi bolmaýy kerek degen túsinik bar.
Budan buryn habarlanǵandaı, búgin elordada QR Prezıdenti Qasym-Jomart Toqaevtyń qatysýymen Qazaqstan Respýblıkasy sýdıalarynyń IX sezi bastaldy.
Jıynda Prezıdent sýdıalardyń jańa ádep kodeksin qabyldaýdy qoldady.
Memleket basshysy sot organdary azamattardyń basty qorǵany bolýy kerek ekenin aıtty.
