Joǵary oqý ornyna túsirýge ýáde etken aqtóbelik alaıaqtyǵy úshin sottaldy

AQTÓBE. KAZINFORM — Aqtóbede medıtsına ýnıversıtetiniń grantyna túsirýge ýáde etken aıyptalýshy alaıaqtyǵy úshin sottaldy. Ol úsh jyldyq jazasyn bostandyqta júrip óteıdi.

Aqtóbe qalasynyń № 2 sotynda Qylmystyq kodekstiń «Alaıaqtyq» baby boıynsha is qaraldy. Aıyptaý aktisine súıensek, 2024 jyldyń qańtar aıynda sottalýshy óziniń tanystaryna «barlyq jerde tanystarym bar» dep aldap, medıtsına ýnıversıtetiniń grant bólimine oqýǵa túsirýge ýáde etken. Bul qyzmeti úshin aqsha suraǵan. 

— Jábirlenýshilerdiń senimine kirip, óz qyzmetiniń aqysyn aıtyp, qarajatty qolma-qol jáne anasynyń esepshotyna aýdaryp alǵan. Saldarynan 3 jábirlenýshige jalpy 5 mln teńge mólsherinde materıaldyq zalal keltirilgen. Sot otyrysynda sottalýshy aıypty tolyq moıyndap, jasaǵan is-áreketine ókinetinin, jábirlenýshilerge keltirgen zalaldy tolyq ótegenin aıtty. Sot úkimimen sottalýshy kináli dep tanylyp, oǵan 3 jyl merzimge bas bostandyǵyn shekteý jazasy taǵaıyndaldy. Jylyna 100 saǵattan májbúrli eńbekke tartylady. Sot úkimi zańdy kúshine engen joq, - dep habarlady Aqtóbe qalasy № 2 sotynyń baspasóz qyzmeti.

Eske salsaq, Aqtóbe oblysy Hromtaý aýdanynyń turǵyny tanysyn bopsalap, odan 5 mln teńge almaq boldy. Vıdeony taratyp jiberemin dep qorqytqan kúdikti 3 mln teńgeni alyp jatqan jerinen ustaldy.