Joǵary oqý oryndarynyń ulttyq reıtıngi engiziledi — Saıasat Nurbek
ASTANA. KAZINFORM — Reıtıngtik kórsetkishteri jaqsy joǵary oqý oryndaryna qosymsha akademııalyq derbestik beriledi. Bul týraly Úkimet otyrysynda Ǵylym jáne joǵary bilim mınıstri Saıasat Nurbek aıtty.
— Azamattardyń joǵary bilim alý quqyǵyn qamtamasyz etý úshin qarjylandyrý tetikterin jetildirý boıynsha júıeli jumys istelip jatyr. 2025 jylǵy 4 jeltoqsanda Memleket basshysy joǵary bilimdi qarjylandyrýdyń jańa modelin kezeń-kezeńimen engizý týraly zańǵa qol qoıdy. Model kadrlardy daıarlaý sapasyn arttyrýǵa jáne básekege qabiletti joǵary oqý oryndaryn qalyptastyrýǵa baǵyttalǵan, — dedi ol.
Mınıstrdiń aıtýynsha, memlekettik tapsyrysty bólý jáne ornalastyrý ekonomıkanyń qajettilikterine shoǵyrlandyrylady.
— Sondaı-aq kelesi jyldan bastap joǵary oqý oryndaryn obektıvti ındıkatorlar men kórsetkishter negizinde baǵalaýdy qarastyratyn JOO-lardyń ulttyq reıtıngi engiziledi. Reıtıng nátıjeleri kadrlardy daıarlaýǵa memlekettik bilim berý tapsyrysyn ornalastyrý úshin joǵary oqý oryndaryn anyqtaý kezinde eskeriletin bolady. Reıtıngtik kórsetkishteri jaqsy joǵary oqý oryndaryna qosymsha akademııalyq derbestik beriledi, — dedi Saıasat Nurbek.
Onyń sózine qaraǵanda, joǵary bilimdi qarjylandyrýdy ártaraptandyrýdyń taǵy bir quraly — endaýment-qorlar.
— 2025 jylǵy 30 maýsymda Prezıdenttiń tapsyrmalaryn oryndaý maqsatynda Endaýment-qorlar týraly zań qabyldandy. Zańdy iske asyrý aıasynda 2026 jylǵy 2 aqpanda jańa zańnamalyq model boıynsha Qazaqstandaǵy alǵashqy «Ǵylym jáne bilim endaýment-qory» memlekettik tirkeýden ótti, qorǵa Alageum Electric kompanııasy 10 mlrd teńge bóldi, — dedi mınıstr.
Aıta keteıik, Úkimet jańa Konstıtýtsııa normalaryn júzege asyrý joldaryn talqylap jatyr.
