Joǵary lıga komandalary arasynda chempıon atanǵan «Gratsııa-KZ» Ulttyq lıgaǵa joldama aldy
ASTANA. KAZINFORM — Astana qalasynda voleıboldan áıelderdiń joǵary lıga komandalary arasynda Qazaqstan chempıonaty máresine jetti.
BQO dene shynyqtyrý jáne sport basqarmasynan málim etkenindeı, Oraldyń «Gratsııa-KZ» klýby elordadaǵy qorytyndy kezeńde bes kezdesý ótkizip, bárinde jeńiske jetti.
Ásirese, sheshýshi básekede «Arý-Astana» komandasyn 3:2 esebimen tize búktirip, chempıon atandy.
Oraldyq komandany Aına, Ásel, Aınur jáne olardyń anasy Nursulý Ǵubasheva jattyqtyrady.
«Gratsııa-KZ» quramynda Aınagúl Aıjaryqova, Mıra men Dıana Ǵubashevalar, Karına Tólegenova, Vıoletta Fılıppova, Dıana Saparǵalıeva, Darıa Avdeeva, Alına Kamaledınova, Kúnbóbek Saıasatova, Ulmeken Ájigereeva, Tomırıs Qaıyrjan, Adel Moldaǵalıeva, Mılana Saparova, Aınazel Keınıatova, Dámeli Sándibekqyzy, Elına Nadyrshına, Ekaterına Bondarenko, Ekaterına Tıtovskaıa, Sofı Dáýletqalıeva óner kórsetti.
«Sońǵy oıynda «Arý-Astanadan» 0:2 esebimen utylyp jatyp, komanda kambek jasap, 3:2 esebimen jeńdi. Osylaısha, «Gratsııa-KZ» Ulttyq lıgaǵa joldama aldy», - dedi komanda bapkeri Nursulý Ǵubasheva.
Komandany osynaý tabysymen BQO dene shynyqtyrý jáne sport basqarmasynyń basshysy Jeńis Nyǵmetýllın quttyqtap, aldaǵy maýsymda sáttilik tiledi.
Kezinde «Gratsııa-KZ» komandasyn belgili voleıbol mamany, Nursulý Ǵubashevanyń jubaıy, marqum Kóleńke Ǵubashev qurǵan edi. Osy klýbtan Qazaqstan ulttyq quramasynyń oıynshylary Sana Anarqulova, Zarına Sıtqazınovalar tárbıelenip shyqty.
Eske sala keteıik, budan buryn Batys Qazaqstanda áıelder voleıbolyn damytýǵa ne kedergi ekendigin jazǵan bolatynbyz.
Sondaı-aq quramynda Oral voleıbolynyń túlegi S.Anarqulova oınaıtyn «Turan» óz tarıhynda tuńǵysh ret voleıboldan el chempıony atandy.
