Joǵary laýazymdarǵa irikteý: áskerılerdiń tsıfrlyq reıtıngi engiziledi
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine áskerı qyzmetshilerdiń quqyqtyq jaǵdaıyn jetildirý, qorǵanys jáne áskerı qyzmet máseleleri boıynsha ózgerister men tolyqtyrýlar engizý týraly» zań maquldandy.
Zańy qorǵanys, áskerı qyzmet, halyqaralyq áskerı yntymaqtastyq jáne áskerı qyzmetshilerdi áleýmettik qamtamasyz etý salasyndaǵy zańnamany jetildirýge baǵyttalǵan.
- Zańmen shet elderdegi áskerı ókil apparattarynyń quqyqtyq mártebesi men qarjylandyrý tártibi naqtylanady, sondaı-aq onda qyzmet atqaratyn áskerı qyzmetshilerdiń laýazymdary dıplomatııalyq qyzmet qyzmetkerlerine teńestiriledi. Arnaýly memlekettik organdardy qospaǵanda, joǵary laýazymdarǵa irikteý kezinde áskerı qyzmetshilerdiń tsıfrlyq reıtıngi engiziledi. Áskerı qyzmetshilerdiń áleýmettik jáne quqyqtyq qorǵalýyn kúsheıtý maqsatynda tótenshe jaǵdaılardy joıýǵa, terrorızmge qarsy operatsııalarǵa jáne tótenshe jaǵdaı rejımin qamtamasyz etýge qatysqan Qarýly Kúshter men Shekara qyzmeti áskerı qyzmetshilerine úsh ese mólsherde aqshalaı tólem qarastyrylǵan, - dedi senator Alısher Satvaldıev.
Sonymen qatar, áskerı qyzmetten bosatý týraly sheshimderge shaǵymdaný merzimderi men tártiptik jazalardy qoldanýdyń shekti merzimderi aıqyndalady. Zań áskerı qyzmet ótkerý tártibin de jetildiredi. Atap aıtqanda, eńbek sińirgen jyldary 25 jyldan asqan áskerı qyzmetshilerge óz qalaýy boıynsha qyzmetten shyǵý quqyǵy beriledi.
- Áskerge shaqyrý boıynsha áskerı qyzmet ótkeretin ofıtserdiń qyzmet etý merzimine bala úsh jasqa tolǵanǵa deıin onyń bala kútimine baılanysty demalysta bolý kezeńi eseptelmeıdi. Bul ýaqyt kezeńi eńbek sińirgen jyldaryna esepteledi. Budan bólek, BUU-dan bitimgershilik mıssııalarǵa qatysatyn áskerı qyzmetshiler úshin bólinetin qarajatty tikeleı aýdarý tetigi engiziledi. Sondaı-aq áskerı jáne qosarlanǵan maqsattaǵy taýarlarǵa baǵa belgileý qaǵıdalaryn bekitý jónindegi qaıtalanatyn norma alynyp tastalady, - dedi depýtat.
Aıta keteıik, Qorǵanys mınıstrligi áskerı qyzmetshilerdiń synyptyq biliktiligin aıqyndaý tártibin bekitti.
