Joǵary deńgeıde óńdelgen taýarlardyń eksportyn ulǵaıtý qajet – Premer-Mınıstr
ASTANA. KAZINFORM – 2025 jyly óńdelgen ónimder men qyzmetter eksportynyń kólemin 41 mlrd dollarǵa deıin jetkizý qajet. Bul týraly Úkimet otyrysynda Qazaqstan Premer-Mınıstri Oljas Bektenov aıtty.
«Ekonomıkany ártaraptandyrý máselesi birinshi kezekte shıkizattyq emes eksport kólemin arttyrýǵa tikeleı baılanysty. Byltyr eksporttyń oń ósimi tirkeldi. Nysanaly ındıkator 3 paıyzǵa asyra oryndaldy. Bıyl odan da joǵary kórsetkishti, ıaǵnı eksport deńgeıin 37,7 mlrd dollarǵa deıin qamtamasyz etý mindeti tur. Al 2025-shi jyldyń qorytyndysy boıynsha óńdelgen ónimder men qyzmetter eksportynyń kólemin 41 mlrd dollarǵa deıin jetkizý qajet. Sonymen qatar biz budan da bıik maqsattar qoıyp, atalǵan josparlardy asyra oryndaýǵa tyrysýymyz kerek», - dedi O. Bektenov.
Bul turǵyda ol osy jumysqa barlyq múddeli mınıstrlikter, ákimdikter, ásirese bıznes belsendi atsalysýy tıis ekenin aıtty.
«Shıkizattyq emes eksportty damytýda joǵary deńgeıde óńdelgen taýarlar eksportyna basa mán berýimiz kerek. Eger muqııat qaraıtyn bolsaq, qyzmet kórsetý eksportynyń kólemi ornyqty ósip keledi – byltyr shamamen 30 paıyzǵa ósti, al shıkizattyq emes taýarlardyń eksporty byltyr kerisinshe 5,7 paıyzǵa tómendep ketken. Taýarlardyń ımporty 21,5 paıyzǵa artqan. Kórip otyrǵandaı, aıyrmashylyq 2 eseden asady, bul saýda balansyna teris áser etedi. Sondyqtan joǵary deńgeıde óńdelgen taýarlardyń óndirisi men eksportyn ulǵaıtý qajet. Ol úshin perspektıva men múmkindik jetkilikti», - dedi Úkimet basshysy.
Premer-Mınıstr otandyq óndirýshiler men eksporttaýshylarǵa belsendi qoldaý jasaýdy tapsyrdy.
«Saqtandyrý, qarjylyq, servıstik sııaqty qoldaý quraldarynyń 20-dan astam túri bar. Olardy tıimdi paıdalanyp, bıznes-qoǵamdastyqqa osy sharalar týraly únemi aqparat jetkizip turý qajet. Konsýltatsııalyq qyzmetter kórsetý, aqparattyq súıemeldeý jáne jańa naryqtarǵa shyǵýǵa kómektesý arqyly eksportqa baǵdarlanǵan kásiporyndardy qoldaýdy kúsheıtý qajet», - dedi O. Bektenov.
