Joǵary bilim salasy jasandy ıntellekti dáýirine qanshalyqty beıimdelip jatyr

ASTANA. KAZINFORM — Professorlyq-oqytýshylyq quramnyń 54 paıyzy jasandy ıntellekti boıynsha kýrstardan ótti. Bul týraly QR Ǵylym jáne joǵary bilim mınıstri Saıasat Nurbek málim etti.

— Mınıstrlik jasandy ıntellektini damytý boıynsha úsh negizgi baǵytta jumys istep jatyr. Bul turǵyda jasandy ıntellekti salasynda kadr daıarlaý, ǵylymı zertteýler jáne qazaq tilin damytý úshin jasandy ıntellektini qoldaný eskerilgen. Negizgi mindetimiz — joǵary bilimdi jasandy ıntellekti dáýiriniń talaptaryna beıimdeý. Osy baǵytta naqty nátıje bar. Qazir 30 joǵary oqý orny jasandy ıntellekti boıynsha 38 bilim berý baǵdarlamasyn iske asyryp jatyr, — dedi S. Nurbek Májilistegi parlamenttik tyńdaý kezinde.

Onyń aıtýynsha, 2025 jyldan barlyq bilim berý baǵdarlamasyna jasandy ıntellektini paıdalaný qyzyreti engizilip, memlekettik standart ózgertildi. Qazirdiń ózinde 95 joǵary oqý orny bilim berý josparlaryna jasandy ıntellekt pánderin engizdi.

— Professorlyq-oqytýshylyq quramnyń 54 paıyzy jasandy ıntellekti boıynsha kýrstardan ótti. Keler jyly tolyq qamtımyz… Stýdentterdi oqytý josparlary ulttyq kompanııalarmen jáne jetekshi kásiporyndarmen birlesip ázirlendi. Bul baǵdarlamalar álemdik tehnologııalar trendterine sáıkes keledi, — dedi mınıstr.

Aıta keteıik, Májilis tóraǵasy Erlan Qoshanov jasandy ıntellektini damytýǵa arnalǵan parlamenttik tyńdaýda bilim berý salasyndaǵy JI qyzmetin zańmen retteý qajettigin atap ótti.