Joǵary aýdıtorlyq palatanyń úsh irikteý otyrysynda óńirlik komıssııalarǵa úmitkerler tyńdaldy
ASTANA. KAZINFORM — QR Joǵary aýdıtorlyq palatasynda turaqty túrde óńirlik tekserý komıssııalaryna kandıdattardy irikteý ótip jatyr. Bıyl Joǵary aýdıtorlyq palatasynda óńirlik tekserý komıssııalary músheleriniń laýazymdaryna kandıdattardy irikteý jónindegi komıssııanyń úsh otyrysy ótti. Bul týraly palatynyń baspasóz qyzmeti málim etti.
Birinshi irikteý aıasynda qańtar aıynda Aqtóbe, Mańǵystaý oblystary men Almaty qalasynyń tekserý komıssııalaryna úmitkerler tyńdaldy. Aqtóbe oblysynan qyzmetke 4 kandıdat, Mańǵystaý oblysynan 6 kandıdat, Almatydan 4 kandıdat ótinish berdi. Aqpan aıynda ótken ekinshi irikteý Túrkistan oblysy men Shymkent qalasynyń tekserý komıssııalaryn qamtydy. Túrkistan oblysynan laýazymǵa 11 kandıdat, Shymkent qalasynan 7 úmitker boldy.
Áńgimelesý qorytyndysy boıynsha ár óńirden úsh úmitkerden irikteldi. Tıisti aqparat Joǵary aýdıtorlyq palatanyń saıtynda jarııalandy, al materıaldar kelisý jáne taǵaıyndaýǵa usyný úshin tekserý komıssııalaryna jiberildi. Sáýir aıynda Komıssııanyń úshinshi otyrysy ótti.
— Almaty qalasy, Aqmola, Batys Qazaqstan jáne Mańǵystaý oblystary boıynsha tekserý komıssııalarynyń músheleri laýazymyna kandıdattar qaraldy. Bos laýazymdarǵa mynadaı ótinimder tústi: Almaty boıynsha 1 úmitker, Aqmola oblysy boıynsha 4 úmitker, Batys Qazaqstan oblysy boıynsha 3 úmitker, Mańǵystaý oblysy boıynsha 4 úmitker. Áńgimelesý qorytyndysy boıynsha Almaty qalasynan 1 kandıdat jáne qalǵan oblystardyń árqaısysynan 3 kandıdat irikteldi, — delingen habarlamada.
Komıssııanyń úshinshi otyrysta qabyldanǵan sheshimi Joǵary aýdıtorlyq palatanyń resmı saıtynda jarııalandy. Barlyq qatysýshylar belgilengen talaptarǵa sáıkes qujattardy tapsyrdy jáne irikteýge jiberildi. Olardyń árqaısysynyń beıindi joǵary bilimi, memlekettik aýdıtor sertıfıkaty nemese esep jáne aýdıt salasynda halyqaralyq biliktiligi bar. Іrikteý barysynda Komıssııa usynylǵan qujattardy qarap, kandıdattardyń kásibı jáne jeke qasıetterin, normatıvtik-quqyqtyq bazany bilýin, kásiptik daıarlyq týraly derekterdi, sondaı-aq arnaýly memlekettik jáne quqyq qorǵaý organdarynan alynǵan málimetterdi baǵalady.
Aıta keteıik, buǵan deıin Joǵary aýdıtorlyq palatanyń ókilderi Ázerbaıjanda aýdıt júrgizgen edi.
