Joǵary aýdıtorlyq palatanyń ókilderi Ázerbaıjanda aýdıt júrgizdi
ASTANA. KAZINFORM — Qazaqstan Respýblıkasy Joǵary aýdıtorlyq palatasynyń ókilderi Ázerbaıjan Respýblıkasy Esep palatasynyń 2025 qarjy jylyndaǵy qarjylyq eseptiligine aýdıt júrgizip jatyr. Bul týraly palatynyń baspasóz qyzmeti málim etti.
Qazaqstan men Ázerbaıjannyń joǵary aýdıt organdary basshylarynyń 2024-2025 jyldary ótken ekijaqty kezdesýleri men ózara saparlarynyń qorytyndysy boıynsha aýdıt júrgizý týraly ýaǵdalastyqqa qol jetkizildi. Tekserý kásibı yntymaqtastyqty damytýdyń mańyzdy kezeńine aınaldy jáne joǵary aýdıt organdarynyń ashyqtyǵy, eseptiligi men táýelsizdigi qaǵıdattaryn nyǵaıtýǵa baǵyttalǵan.
Dárejesi boıynsha teń organdardyń aýdıt júrgizý praktıkasy halyqaralyq standarttarǵa sáıkes keledi jáne álemniń aýdıtorlyq praktıkasynda keńinen qoldanylady.
— Bul aýdıttiń maqsaty — halyqaralyq býhgalterlik esep jáne aýdıt standarttaryna sáıkes Ázerbaıjan Esep palatasynyń qarjylyq eseptiliginiń anyqtyǵyn baǵalaý. Aýdıtorlyq rásimder mynalardy qamtıdy: normatıvtik bazany jáne qarjylyq qujattamany aldyn ala taldaý; ishki baqylaý júıesin baǵalaý; qarjylyq eseptiliktiń tolyqtyǵy men anyqtyǵyn tekserý; jaýapty laýazymdy adamdarmen áńgimelesý. 2026 jylǵy 17-20 aqpan aralyǵynda aýdıtorlar Baký qalasyna baryp, aýdıt júrgizdi. Qazaqstannyń Joǵary aýdıtorlyq palatasynyń delegatsııasyn Ázerbaıjan Esep palatasynyń tóraǵasy Vıýgar Gıýlmamedov qarsy aldy. Tekseriletin organnyń beıindik bólimshelerimen de jumys kezdesýleri ótti, — delingen habarlamada.
Jumys qorytyndysy boıynsha qarjylyq eseptiliktiń anyqtyǵyn baǵalaý jáne qarjylyq basqarý men ishki baqylaý protsesterin odan ári jetildirý boıynsha usynymdar berilip, aýdıtorlyq qorytyndy daıyndalady. Qazaqstan men Ázerbaıjannyń joǵary aýdıt organdary tájirıbe almasýdy jalǵastyrýǵa, joǵary aýdıt organdarynyń halyqaralyq uıymdary sheńberinde ózara is-qımyldy keńeıtýge jáne memlekettik aýdıt pen qarjylyq baqylaýdyń tıimdiligin arttyrýǵa baǵyttalǵan birlesken jobalardy iske asyrýǵa nıetti.