Joǵary aýdıtorlyq palata nege ashyq jumys istemeıdi – depýtat saýalyna jaýap

ASTANA. KAZINFORM – Joǵary aýdıtorlyq palata tóraǵasy Álıhan Smaıylov Aýyl sharýashylyǵyna bólingen sýbsıdııalar, Áleýmettik medıtsınalyq saqtandyrý qorynyń tıimdiligi, Nazarbaev Ýnıversıtettiń jumysy týraly aýdıtterdiń keıbir tustaryn nege qoǵamǵa ashyp kórsetpeıtinin túsindirdi.

- Biz memlekettik aýdıt nátıjeleriniń tolyq jarııalanýyna jurtshylyqtyń qyzyǵýshylyq tanytatynyn kórip otyrmyz. Biraq Joǵary aýdıtorlyq palata qupııa aqparattyń árbir túrin qorǵaýǵa qatysty belgilengen zańnamalyq shekteýlerdi eskerýge mindetti.

Kórsetilgen málimetterdiń tolyq ashylýy múddeli uıymdar men azamattar tarapynan sot talaptaryn qoıý múmkindigin qosa alǵanda, quqyqtyq táýekelderdi týdyrady. Atap aıtqanda, kommertsııalyq qupııany jarııa etý saldarynan zalaldy óteý týraly talaptar qoıylýy, derbes derekterdi qorǵaý quqyǵynyń buzylǵany týraly ótinishterdiń berilýi, al erekshe jaǵdaılarda – laýazymdyq ókilettikterdi asyra paıdalanǵany úshin qylmystyq jaýaptylyqqa tartylýy múmkin, - dep jazady palata tóraǵasy.

Aıtýynsha, shekten tys ashyqtyq quqyqtyq daý týyndatyp qana qoımaı, halyqtyń memleketke degen senimin azaıtyp jiberýi múmkin.

- Kez kelgen tekserý túrli sýbektilerdiń múddesin qozǵaıdy, aqparatty artyq ashý sebepteri boıynsha memlekettik aýdıtorlardyń is-áreketterine sot tártibimen shaǵymdaný yqtımaldyǵy bar. Mundaı sot protsesteri materıaldyq shyǵyndarmen qatar, Joǵary aýdıtorlyq palatanyń ǵana emes, basqa da memlekettik ınstıtýttardyń bedeline nuqsan keltirýi múmkin, - delingen jaýapta.

Degenmen Álıhan Smaıylov qoldanystaǵy zańnamada qoǵamdyq mańyzy bar aqparattar men qoljetimdiligi shekteýli málimetterdiń ara jigin ajyratýdyń tolyq ólshemsharttary aıqyn emes ekenin moıyndaıdy.

- Osyǵan baılanysty, Joǵary aýdıtorlyq palata aıqyndyq talaptary men qupııalylyq rejımin saqtaý arasyndaǵy teńgerimdi jetkilikti qamtamasyz etý úshin árbir jeke alynǵan aqparatty daıyndaý kezinde muqııat taldaý jasaıdy. Osylaısha, ashyqtyq deńgeıin arttyrý týraly talaptar qoldanystaǵy zańnamalyq shekteýlerdi árqashan eskermeıdi. Qalyptasqan jaǵdaı sýbektıvti tańdaýmen emes, qoldanystaǵy zańnamanyń normalaryn qatań saqtaý qajettiligimen negizdelgen. Jarııalanatyn árbir aqparat yqtımal zardaptar turǵysynan kóp deńgeıli tekserýden ótedi jáne osyndaı keshendi baǵalaýdan keıin ǵana jurtshylyqqa qoljetimdi bolady, - dep jazylǵan jaýapta.

Resmı derek boıynsha, byltyr Joǵary aýdıtorlyq palata byltyr memleketke 135 mlrd teńge qaıtarǵan.