Joǵary aýdıtorlyq palata múshesiniń ókilettigi toqtatyldy

ASTANA. KAZINFORM — Búgin Senattyń jalpy otyrysynda QR Joǵary aýdıtorlyq palatasy múshesiniń ókilettigi toqtatyldy.

— Parlament Senatyna QR Joǵary aýdıtorlyq palatasynyń múshesi Rashıt Ahmetovtiń qyzmetinen bosatý týraly ótinishi engizildi. R. Saıranuly 2017 jyldyń maýsymynan 2022 jyldyń maýsymyna deıin Respýblıkalyq bıýdjettiń atqarylýyn baqylaý jónindegi esep komıtetiniń múshesi boldy. 2022 jyldyń qarashasynan bastap Joǵary aýdıtorlyq palatanyń múshesi. Senattyń Qarjy jáne bıýdjet komıteti reglamentke sáıkes komıtet otyrysynda talqylaı otyryp, palata otyrysyna QR Joǵary aýdıtorlyq palatasynyń Senat taǵaıyndaǵan múshesi Rashıt Saıranulynyń ókilettigin toqtatyp, qyzmetinen bosatýdy usynady, — dedi depýtat Sultanbek Mákejanov.

Palata depýtattary atalǵan usynysqa qoldaý bildirdi.

R.Ahmetov 1959 jyly 7 qazanda Batys Qazaqstan oblysy Jańaqala aýdanynyń Jańa Qazan aýylynda dúnıege keldi.

1982 jyly Almaty temir jol transporty ınjenerleri ınstıtýtynyń «Vagon jasaý jáne vagon sharýashylyǵy» mamandyǵy boıynsha, 2002 jyly — Batys Qazaqstan ınjenerlik-tehnologııalyq ýnıversıtetiniń Basqarý jáne quqyq ınstıtýtyn «Zańger» mamandyǵy boıynsha bitirgen.

Eńbek jolyn 1982 jyly vagon deposynyń masteri bolyp bastady (Oral q.).

1982 jylǵy tamyz –1984 jylǵy maýsym aralyǵynda Keńes áskerleri qatarynda qyzmet etti.

1984 jylǵy qyrkúıek –1989 jylǵy sáýir aralyǵynda Oral qalasy vagon deposynda aǵa sheber, bas mehanık, basshynyń orynbasary.

1989 jylǵy sáýir — 1991 jylǵy qarasha aralyǵynda Oral qalasy temirjoldar toraby partkomy hatshysynyń orynbasary.

1991 jylǵy qarasha — 1994 jylǵy aqpan aralyǵynda Oral mehanıkalyq zaýytynda bas broker, kommertsııalyq ortalyqtyń basshysy, dırektordyń orynbasary.

1994 jylǵy aqpan — 1999 jylǵy jeltoqsan aralyǵynda «Nurjanar» AAQ-nyń prezıdenti.

1999 jylǵy qyrkúıek — 2017 jylǵy maýsym aralyǵynda Qazaqstan Respýblıkasy Parlamenti Senatynyń depýtaty, Qarjy jáne bıýdjet jónindegi turaqty komıtettiń múshesi, hatshysy, tóraǵasy.

2017 jylǵy maýsym — 2022 jylǵy maýsym aralyǵynda Respýblıkalyq bıýdjettiń atqarylýyn baqylaý jónindegi esep komıtetiniń múshesi.

Qazaqstan Respýblıkasy Parlamenti Senatynyń 2022 jylǵy 1 jeltoqsandaǵy № 374-VII PS qaýlysymen Qazaqstan Respýblıkasy Joǵary aýdıtorlyq palatasynyń múshesi bolyp taǵaıyndaldy.

Osyǵan deıin Senat Joǵarǵy sottyń sýdıalaryn qyzmetinen bosatqanyn habarladyq.