Joǵarǵy Sottyń janyndaǵy Halyqaralyq keńestiń úshinshi otyrysy ótti
Jıynǵa Halyqaralyq keńestiń músheleri, elimizdiń joǵary sot organynyń sýdıalary, Joǵarǵy Sot janyndaǵy Sottardyń qyzmetin qamtamasyz etý departamentiniń basshylyǵy men jaýapty qyzmetkerleri qatysty.
Otyrysty asha kele, Joǵarǵy Sot Tóraǵasy Qaırat Mámı aǵymdaǵy jyly Joǵarǵy Sottyń jalpy otyrysynyń qaýlysyna sáıkes Keńestiń quramy 15 adamǵa jańarǵanyn atap ótti. Keńes quramyna Reseı memlekettik sot tóreligi ýnıversıtetiniń Qylmystyq sot isin júrgizý bóliminiń meńgerýshisi, zań ǵylymdarynyń doktory Oksana Kachalova, Anglııa jáne Ýels (Ulybrıtanııa) Joǵary sottarynyń advokaty, «Strategııalyq bastamalar ortalyǵy» seriktestiginiń seriktesi Kırıll Zenın, Tallın okrýgtyq sotynyń jáne Evrodjast qadaǵalaýshy sotynyń sýdıasy Pavel Goncharev qosymsha múshe bolyp kirdi.
«Keńes Memleket basshysynyń tapsyrmasyn oryndaý maqsatynda quryldy. Jumys isteı bastaǵanyna bir jyldan sál astam ýaqyt ótkenine qaramastan Halyqaralyq keńes ınstıtýt retinde qalyptasty. Onyń qyzmeti halyqaralyq praktıka turǵysynan sot tóreligin júzege asyrý jumysyna usynymdar men tujyrymdar berýimen mańyzdy», - dedi Q. Mámı.
Keńes músheleriniń belsendi qyzmetiniń nátıjesinde alǵash ret ınvestıtsııalyq daýlardy qaraý boıynsha ádistemelik túsindirýler ázirlendi, ınvestorlardyń qatysýymen bolatyn daýlar boıynsha belgili bir usynymdar ázirleý maqsatynda memlekettik organdar ókilderi men ınvestorlardyń qatysýymen kezdesýler ótkizildi, naqty sot isteri boıynsha protsestik zańnama sheńberinde qorytyndylar ázirlendi.
Sondyqtan 2017 jylǵy jumys josparynda sarapshylardyń usynystaryn eskere otyryp, qylmystyq jáne azamattyq sot isin júrgizýdiń ózekti máseleri engizildi.
Joǵarǵy Sottyń mamandyrylǵan sot alqasynyń tóraǵasy Aıgúl Qydyrbaeva otyrys qatysýshylaryna ótken jyldaǵy Keńes jumysynyń negizgi nátıjeleri jáne alǵa qoıylǵan josparlary týraly baıandady.
Kezdesýdiń negizgi kún tártibindegi máselelerge kóshe otyryp, Q. Mámı sot júıesin jańǵyrtýmen qatar, reformalaý sotta múddelerge ókildik etý ınstıtýtyna yqpal etýi tıistigin atap ótti. «Bul máseleniń ózektiligi osy jyldyń basynda Respýblıka Prezıdenti janyndaǵy Quqyqtyq saıasat jónindegi keńestiń otyrysynda atalyp ótilgen bolatyn. Sondyqtan da Halyqaralyq keńes sotta múddelerge ókildik etýdi retteýdiń sheteldik ozyq tájirıbesin osy ınstıtýtty zań qyzmetin kórsetý salasyn odan ári jetildirý barysynda engizý turǵysynan zerdeleýdi josparlap otyr», - dedi ol.
Osy taqyryp boıynsha otyrys barysynda «QazBar» Qazaqstandaǵy kommertsııalyq zańgerler qaýymdastyǵynyń basqarý keńesiniń tóraǵasy, Halyqaralyq keńestiń múshesi Aıgúl Kenjebaeva sóz sóıledi.
Kelesi spıkerge sóz usyna otyryp, moderator quqyqtyq memleketterdiń reıtıngisi zań ústemdigi ındeksi, sonyń ishinde, qylmystyq sot tóreliginiń kórsetkishteri boıynsha anyqtalatyndyǵyn atap ótti. «Ózderińizge málim, Qazaqstannyń qazirgi tańdaǵy qylmystyq saıasaty izgilendirýge jáne qylmystyq quqyqtyq buzýshylyqtardy dekrımınalızatsııalaýǵa baǵyttalǵan, sonyń ishinde shyn mánindegi bas bostandyǵynan aıyrý jazasy aıyppul salý jazasyna aýystyrylýda», - dedi Q.Mámı.
Keńes músheleri men Joǵarǵy Sot sýdıalarynan quralǵan tıisti jumys toby júrgizgen taldaýdyń negizgi baǵyttary men basty tujyrymdary týraly Halyqaralyq keńestiń múshesi Oksana Kachalova baıandady.
Jıynda keńes músheleri bir apta ishinde óz usynystaryn berýleri kerek, bul usynymdar oryndaý úshin barlyq múddeli qurylymdarǵa joldanatyn bolady. Otyrys barysynda sóılegen sózderdiń mátinderi men usynymdar Joǵarǵy Sot saıtynyń tıisti bóliminde ornalastyrylatyn bolady.
Otyrystyń resmı bóligin qorytyndylaı kele, Joǵarǵy Sot Tóraǵasy saltanatty jaǵdaıda Keńestiń neǵurlym belsendi músheleri Aıgúl Kenjebaevany, Iorg Pýdelka, Kýrtıs Masters men Jumageldi Elýbaevty Halyqaralyq keńes jumysyna belsene qatysqany, kórsetken kásibıligi men respýblıkanyń sot júıesiniń damýyna qosqan úlesi úshin alǵys hattarmen marapattady, - delingen Joǵarǵy Sottyń baspasóz baıanynda.
