Joǵarǵy sottyń sybaılas jemqorlyq áreketterine qatysy bar dep aıyptalǵan eki sýdıasy qamaýǵa alyndy - Bas prokýratýra
ASTANA. 28 sáýir. QazAqparat /Jasulan Amanbaıuly/ - Joǵarǵy sottyń sybaılas jemqorlyq áreketterine qatysy bar dep aıyptalǵan sýdıalary Almaz Táshenova men Saılaýbek Jákishev qamaýǵa alyndy. Bul týraly búgin Astanada ótken baspasóz máslıhatynda Bas prokýratýranyń resmı ókili Jandos Ómirálıev málim etti.
«Táshenova men Jákishevke qatysty qylmystyq isti Qarjy polıtsııasy tergep jatyr. Sottyń sheshimimen ol ekeýin qamaýǵa alý týraly úkimi shyǵaryldy»,-dedi J. Ómirálıev.
Onyń atap ótkenindeı, QR Bas prokýratýrasy atalǵan qylmystyq istiń barysyn qadaǵalaýǵa alǵan. Tergeý amaldary júrip jatyr.
Eske sala keteıik, sáýirdiń orta tusynda QR Ekonomıkalyq qylmysqa jáne sybaılas jemqorlyqqa qarsy kúres agenttigi QR Parlamenti Senatynyń kómegimen QR Joǵarǵy sotynyń Azamattyq jáne ákimshilik ister jónindegi qadaǵalaý alqasynyń tóraıymy Almaz Táshenovanyń jáne QR Joǵarǵy sotynyń sýdıasy Saılaýbek Jákishevtiń áreketterinen sybaılas jemqorlyq qylmys faktileri anyqtaldy degen aıyp taǵa otyryp, olardy qyzmetinen bosatqan bolatyn. Sonymen qatar Joǵary Sottyń taǵy tórt sýdıasy qyzmetterinen alastatyldy.
Bunyń aldynda Bas prokýror Ashat Daýylbaev «Joǵarǵy sottyń sybaılas jemqorlyq áreketterine qatysy bar sýdıalarynyń ústinen qylmystyq is qozǵaldy. Ony ekonomıkalyq qylmysqa jáne sybaılas jemqorlyqqa qarsy kúres agenttigi tekserip jatyr», degen aqparatty taratqan bolatyn.
