Joǵarǵy Sottyń sýdıalar sany 45-ten 30 birlikke deıin qysqardy - B. Beknazarov
ASTANA. 18 qańtar. QazAqparat /Qanat Mámetqazyuly/ - 2012 jyldyń 1-i qańtarynan bastap Joǵarǵy Sottyń sýdıalar sany 45-ten 30 birlikke deıin qysqardy.
Bul týraly búgin QR Parlamenti Senatynyń jalpy otyrysynda sot júıesine qatysty zań jobalaryn talqylaý barysynda QR Joǵarǵy Sotynyń Tóraǵasy Bektas Beknazarov málim etti.
Bektas Beknazarovtyń aıtýynsha, bosaǵan qarajat óńirlerde ıývenaldyq sottardy qurý úshin paıdalanylady. «Zań jobalarynda tehnıkalyq quraldar, sot otyrystarynda dybys jáne beınejazýdy is júrgizý turǵysynan retteý týraly tyń usynystar da bar. Bunyń ózi is júrgizý normalaryn saqtaýdy qamtamasyz etip, protseske qatysýshylardyń óz quqyqtaryn durys paıdalanýǵa yqpal etedi», - deıdi Joǵarǵy Sot Tóraǵasy.
Onyń aıtýynsha, qujatta sot rásimderin jurtshylyqtyń kóz aldynda ashyq júrgizý, quqyqtyq jáne tehnıkalyq múmkindikterdi keńinen paıdalaný sharalary sot qatelikterin azaıtýǵa keńinen yqpal etetin bolady.
Toqtala ketetin jaıt, zań jobasymen sýdıalardyń zeınetkerlikke shyǵýynyń jalpy tártibi belgilenedi. Sonymen bir mezgilde sýdıa qyzmetinde bolýdyń shekti jasy: áıel adamdar úshin 63 jas jáne er adamdar úshin 68 jas retinde belgilenedi. Bul rette sýdıanyń shekti jasqa jetkenge deıin óz qyzmetinde odan ári bolýy máselesin Joǵarǵy Sotynyń Tóraǵasy sheshetin bolady. «Alaıda, Memleket basshysy sýdıalardyń sezinde memleket sýdıalar úshin zeınetkerlik jasty uzartý máselesin sheshti dep atap ótken. Bul sýdıa qyzmetinde bolýdyń qazirgi shekti jasyn saqtap qalý kerektigin, onyń qoldanystaǵy zańnamalyq reglamenttelýi durys ekenin rastaıdy. Osyǵan baılanysty atalǵan erejeni zań jobasynan alyp tastaý jáne sýdıa qyzmetinde bolýdyń shekti jasy týraly qoldanystaǵy redantsııany naqtylaı otyryp, saqtap qalý usynyldy», - delingen zań jobasynyń qorytyndysynda.
