Joǵarǵy sottyń burynǵy sýdıalaryna qatysty úkim buzyldy

QARAǴANDY. 6 jeltoqsan. QazAqparat - Qaraǵandy oblystyq soty apellıatsııalyq alqasynyń qaýlysymen Joǵarǵy sottyń eks- sýdıalary Saılaýbek Jákishev pen Almaz Táshenovaǵa qatysty úkim buzyldy, dep habarlaıdy «QazAqparat» tilshisi.

«Úkim tolyǵymen buzylsyn. Іsti qaıta qaraýǵa jiberý, qylmystylyq boıynsha másele sheshilgenge deıin qylmystyq isti Joǵarǵy sotqa berý», - dedi búgin qaýlynyń qorytyndy bóligin oqyp bergen Qaraǵandy oblystyq soty apellıatsııalyq alqasynyń tóraǵasy Erden Áripov.

Oǵan qosa, apellıatsııalyq alqa sot otyrysy zalynda qorǵaýshylar buzýshylyqtarǵa jol bergendigine qatysty alǵashqy ınstantsııadaǵy sottyń jeke úkimin buzdy.  

Advokattar naqtylaǵandaı, endigide eks-sýdıalar sottalǵandar  emes, olardyń statýsy qaıtadan aıyptalýshylarǵa kóshti.

Buǵan deıin habarlanǵandaı, Kókshetaýda Aqmola oblystyq qylmystyq ister boıynsha mamandandyrylǵan sotynda QR Joǵarǵy sotynyń burynǵy sýdıalary Almaz Táshenova pen Saılaýbek Jákishevke qatysty sot úkimi jarııalandy.

Sot S. Jákishevti asa qomaqty kólemde - 70 myń AQSh dollar para bergeni úshin kináli dep tanyp (QR QK-niń 213-babynyń 5-bólimi), múlkin tárkileı otyryp, jazasyn qatań rejımdegi abaqtyda óteýmen 12 jylǵa bas bostandyǵynan aıyrdy. Sonymen qatar ol bostandyqqa shyqqannan keıin 5 jylǵa deıin sýdıa jáne memorgandarda basqarýshylyq laýazymdarda qyzmet etý quqyǵynan aıyryldy.

Aıyptalǵan ekinshi sot sýdıasy Almaz Táshenova para alǵany úshin (QR QK-niń 311-babynyń 5-bólimi) múlkin tárkileı otyryp, jazasyn jalpy rejımdegi túzeý mekemesinde óteýmen 10 jylǵa sottaldy. Oǵan sondaı-aq bostandyqqa shyqqannan keıin 5 jylǵa deıin sýdıa qyzmetin atqarýǵa tyıym salyndy.