«Joǵarǵy sottyń alty sýdıasy birdeı isti boldy»-respýblıkalyq basylymdarǵa sholý
***
«Keshe Aqordada Memleket basshysy Nursultan Nazarbaev «Shevron» korporatsııasynyń bas atqarýshy dırektory jáne dırektorlar keńesiniń tóraǵasy Djon Ýotsondy qabyldady», - dep jazady «Egemen Qazaqstan» gazeti. Áńgime barysynda ekijaqty yntymaqtastyq máseleleri talqylandy. «Prezıdent birneshe jyldan beri Qazaqstandy tabysty basqarýshy kóshbasshy bolyp tabylady. Muny ótken prezıdenttik saılaýdyń nátıjesi aıqyn kórsetti. Ol ońaıǵa soqpaǵan ótken jyldarda da, taıaýdaǵy jahandyq qarjylyq daǵdarysta da eldi óte tıimdi jáne tabysty basqaryp keledi. Qazaqstan tańǵalarlyqtaı nátıjeler kórsetti. Nursultan Nazarbaev eldegi ınvestıtsııalyq ahýaldyń jaqsarýyna erekshe mán beredi», - dedi jýrnalısterge arnalǵan brıfıng barysynda D.Ýotson.
«Egemen Qazaqstan» gazetiniń jazýynsha, keshe Senat Tóraǵasy Qasym-Jomart Toqaevtyń jetekshiligimen ótken palatanyń kezekti jalpy otyrysynda Aýǵanstan Islam Respýblıkasynyń turaqtylyǵyn qamtamasyz etýge qatysty jalǵyz másele qaralǵan. Atalǵan zańdyq qujat boıynsha baıandamany Syrtqy ister mınıstriniń orynbasary Qaırat Omarov jasady. Onyń málimetine qaraǵanda, búginge deıin elimiz aýmaǵy arqyly 10 myńǵa jýyq tranzıttik reıs jasalǵan. Kelisim bekigen jaǵdaıda buǵan deıin qol qoıylǵan ózara túsinistik týraly memorandým kúshin joıatyn bolady. Sondaı-aq qujat Aýǵanstandaǵy turaqtylyqty qamtamasyz etýge jáne Ortalyq Azııadaǵy qaýipsizdikti ornatýǵa yqpal etetini erekshe atap ótildi.
***
«Oral óńirinde keshe sáske túske taman bastalǵan jaýyn el orynǵa otyrǵan shaqta qylaýlaǵan qarǵa ulasyp, sonan soń qaıtadan jańbyrǵa aınalyp, búgin áli jaýyp tur», - dep jazady «Aıqyn» gazeti búgingi nómirindegi «Jaǵdaı óte kúrdeli, biraq eshkim kómeksiz qalmaıdy» degen maqalasynda. Basylymnyń tasqyn sýǵa tosqyn bolý úshin qurylǵan oblystyq komıssııanyń málimetine súıenip, jazýynsha, búginderi 1100 turǵyn úı men 2 myńǵa tarta saıajaı úıshikteri alapat sýdyń qushaǵynda. Buǵan qosa, densaýlyq saqtaý salasynyń 5 nysany, 21 mektep, 1 balabaqsha jáne 14 qosalqy elektr stansasy sý qursaýynda. Al oblystyq aýyl sharýashylyq basqarmasynyń bastyǵy M. Ońǵarbekovtyń málimetine qaraǵanda, 20 myń gektar kúzdik bıdaı alqabyn da sý basqan. Qaýipsiz aımaqqa kóshirilgen 2580 adamǵa bul kúnderi ystyq tamaq pen qajetti dárigerlik kómek uıymdastyrylýda.
Osy basylymnyń qulaǵdar etýinshe, kóktem kelgennen «Ohotzooprom» memlekettik kásipornynyń Batys Qazaqstan aımaqtyq fılıaly kıik sanaǵyn bastap ketken. Ústirt aýmaǵyn qarap shyqqan olar nebári 62 kıiktiń bar ekenin aıtyp otyr. «Jyl mezgiliniń kóktemi men kúzinde sanaq júrgizetin mekeme ótken jyly Ústirt aýmaǵynan 4,5 myń kıikti sanap úlgergen. Búgingi qolda bar derek kózderi jáýdirep, adamnan úrke qashatyn kıiktiń múldem quryp ketýi múmkin-aý degen oı qaldyrady. Bul dabyl qaǵarlyq jaıt», - dep jazady basylym. Maqala «Baılyǵymyz brakonerlerge «jem» boldy» degen taqyryppen berilgen.
***
«Túske deıingi otyrystan «erteń 15 sáýirde kezdesemiz» dep tarqasqan senatorlar kúnniń ekintisinde qaıta jınalyp, shuǵyl túrde másele qarap, baıa-aıaǵy jarty saǵattyń ishinde QR Joǵarǵy sotynyń birqatar sýdıalaryn qyzmetinen bosatty», - dep jazady «Alash aınasy» gazeti. Basylymnyń atap ótýinshe, Elbasynyń ókildik berýmen Senat otyrysyna kelgen QR Prezıdenti Ákimshiliginiń basshysy Aslan Mýsın QR Prezıdenti atynan birqatar sýdıany qyzmetinen bosatý týraly usynys jasaǵan. Bul jaıynda tereńirek basylymnyń búgingi nómirindegi «Joǵarǵy sottyń alty sýdıasy birdeı isti boldy» degen maqaladan bile alasyzdar.
«Alash aınasy» gazetiniń turaqty «Dat!» aıdarynda dáriger, Qazaqstan qajylar qaýymdastyǵynyń múshesi Raýshan Orymbaevamen aradaǵy suhbat «Betin tumshalap júrgenderdiń bárin birdeı ımandy dep aıtýǵa bolmaıdy» degen taqyryppen berilgen. Basylymnyń barlyq saýaldaryna tuşymdy jaýap bergen ol: «Dinge bet burǵan qyz-kelinshekterdiń birqatary qap-qara oramal taǵyp, qap-qara kóılek kıip júredi. Bul - durys emes. Másele kıimde emes, másele - júrektiń, rýhtyń tazalyǵynda. Qazaq halqynyń óz dástúri, óz salty, óz kıimi bar. Imandylyqqa den qoıǵan qyzdarymyz sol óz dilimizge saı kıinse bolǵany», - deıdi.
***
«Kazahstanskaıa pravda» gazetiniń jazýynsha, Óskemende tasqyn saldarynan 396 saıajaı men 294 turǵyn úı sý astynda qalǵan. Keı jerlerde sý deńgeıi tipti 1 metrge jetedi. Aýa temperatýrasynyń kúrt jylynýy saldarynan qardyń jyldam erýi oryn alyp, qalanyń Sogra, Gavan shaǵyn aýdandary aýmaǵymen ótetin Mahovka, Ovechıı klıých ózenderi arnasynan asyp-tasýda. «Keshe ózenniń sý deńgeıi tómendedi. Degenmen jaǵdaı kúrdeli bolyp otyr. Aýa temperatýrasy áli de joǵary, sondyqtan sýdyń jaǵalaýǵa qaıta shyǵýy múmkin», - dep jazady basylym «Voda voshla v doma» degen maqalasynda.
