Joǵarǵy sotta Sýdıalar ádebi kodeksi talqylandy

ASTANA. QazAqparat - Búgin Joǵarǵy sotta «Sybaılas jemqorlyqqa qarsy is-qımyl jáne sýdıalar korpýsynyń ádep normalaryn saqtaýynyń ózekti máseleleri» taqyrybynda «dóńgelek ústeli» bolyp ótti, dep habarlaıdy atalǵan vedomstvonyń baspasóz qyzmetinen.

Іs-shara Qazaqstan Respýblıkasy Joǵarǵy Sotynyń, BUU-nyń esirtki jáne qylmyspen kúres jónindegi basqarmasynyń, Eýropalyq Keńestiń Venetsıalyq Komıssııasynyń jáne EQYU-nyń Astanadaǵy ortalyǵynyń bastamasymen uıymdastyryldy.

«Dóńgelek ústel» jumysyna Joǵarǵy sottyń qylmystyq ister jónindegi qadaǵalaýshy sot alqasy tóraǵasynyń mindetin atqarýshy Á.Quryqbaev, Moldova Respýblıkasy Ádilet mınıstriniń orynbasary, Eýropalyq Keńestiń Venetsıalyq Komıssııasynyń múshesi E.Nıkolae, Joǵarǵy sot sýdıalary, sybaılas jemqorlyqqa qarsy is-qımyl jónindegi halyqaralyq sarapshylar, sondaı-aq ÚEU ókilderi qatysty.

Іs-sharaǵa qatysýshylar sot júıesiniń táýelsizdigi, Ystambulda qabyldanǵan Sybaılas jemqorlyqqa qarsy is-qımyl josparyn iske asyrý, sýdıalar korpýsynyń ádep normalaryn saqtaýy jáne Sot jıýrıi qyzmetiniń máselelerin talqylady.

«Dóńgelek ústel» jumysyna tóraǵalyq etýshi Á.Quryqbaev óziniń quttyqtaý sózinde: «Ádep normalarynyń joǵary standarttaryn qamtamasyz etpeıinshe, sottardyń jumysy týraly halyqtyń joǵary baǵasyna ıe bolý múmkin emes. Mine, sondyqtan da sybaılas jemqorlyqqa qarsy is-qımyl jáne sýdıalyq ádeptilikti saqtaý máseleleri ózekti bolyp tabylady», - dedi.

«Dóńgelek ústel» jumysynyń arnaıy bólimi Sýdıalar ádebi kodeksiniń jańa nusqasyn talqylaýǵa arnaldy. Sýdıalar korpýsy úshin óte mańyzdy qujatty tanystyrý barysynda Joǵarǵy sot sýdıasy Q.Shaýharov Memleket basshysynyń halyqqa arnaǵan Joldaýyn iske asyrý qarsańynda Kodeksti qabyldaýdyń qajettiligin atap ótti.

Dóńgelek ústeldiń qorytyndysy boıynsha syndarly pikir almasý oryn alyp, sybaılas jemqorlyqpen kúres jáne sýdıalar korpýsynyń ádep normalaryn saqtaý máseleleri boıynsha usynymdar ázirlendi.