Joǵarǵy Sotta sot júıesiniń ardageri Nazym Sýhanovaǵa qurmet kórsetildi
Joǵarǵy Sot Tóraǵasy Qaırat Mámı mereıtoı ıesin 70 jasqa tolýymen quttyqtaı kele: «Nazym Tańatarqyzynyń otyz bes jyl biryńǵaı sot salasynda ádildikpen atqarǵan sýdıalyq qyzmeti búgingi jas sýdıalar úlgi alatyndaı ǵıbraty mol, ónegeli jol ekeni anyq. Qandaı qyzmet tapsyrylsa da, Nazym Tańatarqyzy óziniń biliktiligimen, tabandylyǵymen, iskerligimen kórindi», - dedi.
Joǵarǵy Sot Tóraǵasy ardagerdi «Qazaqstan Respýblıkasynyń Táýelsizdigine 25 jyl» merekelik medalimen, «Minsiz qyzmeti úshin» vedomstvolyq medalimen marapattap, oǵan estelik syılyq tabystady.
Áriptesteri Nazym Tańatarqyzyna zor densaýlyq, uzaq ómir jáne amandyq tiledi.
Іs-shara barysynda mereıtoı ıesin Sýdıalar odaǵy Ortalyq keńesiniń múshesi N.Synǵalıeva, sondaı-aq Almaty qalalyq soty men Mańǵystaý oblystyq sotynyń sýdıalary quttyqtady.
Nazym Tańatarqyzy óziniń eńbek jolyn 1965 jyly Atyraý qalasyndaǵy aımaqtyq agrohımııalyq zerthanada zerthanashy bolyp bastaǵan. 1971 jyly S.Kırov atyndaǵy Qazaq memlekettik ýnıversıtetin támamdaǵan soń ol Almaty qalasyndaǵy krımınalıstıkalyq zertteýler bóliminiń ǵylymı qyzmetkeri bolyp istedi.
N.Sýhanova Mańǵyshlaq (qazirgi - Mańǵystaý) oblystyq sotynyń, Gýrev (qazirgi - Atyraý) oblystyq sotynyń, Almaty qalalyq sotynyń múshesi bolyp qyzmet atqardy. 1994-2008 jyldar aralyǵynda Joǵarǵy Sottyń sýdıasy bolyp istep, otstavkaǵa shyqty. Ol Joǵarǵy Sottyń azamattyq ister jónindegi alqasynyń tóraǵasy laýazymyn atqardy. Nazym Tańatarqyzy respýblıkamyz táýelsizdik alǵan alǵashqy jyldary sot júıesiniń qalyptasýyna óz úlesin qosty.
