Joǵarǵy sotta sot salasyndaǵy monıtorıng jumystaryna baılanysty arnaıy semınar ótti

dep habarlaıdy QazAqparat.

Shara barysynda elimizdiń sot salasynyń ókilderi ádil sot qyzmetin qamtamasyz etýdegi monıtorıng sharalarynyń róline baılanysty sheteldik sarapshylardyń álemdik tájirıbe negizinde jasaǵan baıandamalaryn tyńdap, osy máselege baılanysty ózara pikir almasty.

Sharany uıymdastyrýshy Birikken Ulttar Uıymynyń Damý baǵdarlamasynyń Qazaqstandaǵy turaqty ókiliniń kómekshisi, Tıimdi basqarý jáne aımaqtyq damý departamentiniń jetekshisi Ekaterına Panıklovanyń aıtýynsha, búgingi shara tájirıbe almasýǵa arnalǵan. «Sebebi sot júıesiniń monıtorıngi álem boıynsha alǵanda eń qıyn salalardyń biri. Ár memlekettiń sot júıesiniń ózindik erekshelikteri men ózindik qasıetteri bar. Sondyqtan bul óte jan-jaqty ári túbegeıli qarastyrýdy qajet etetin túıtkildi másele. Onyń ústine sot táýelsiz júıe bolyp tabylady. Al táýelsiz júıege nemese úderiske monıtorıng júrgizý óte qıyn jáne onda qashanda kúrmeýli máseleler kóp bolady. Osy turǵydan alǵanda biz búgingi jıyn barysynda monıtorıngti kim qalaı júrgizedi degen máselege emes, onyń sapasyna basa kóńil bólip otyrmyz», dedi departament jetekshisi.

Onyń aıtýynsha, búgingi basqosýǵa qatysyp otyrǵan sarapshylardyń sot salasyndaǵy monıtorıng jumystarynan tájirıbeleri zor. «Sondyqtan otyrysqa qatysýshylar olardyń baıandamalarynan kóp qundy málimetter men aqyl-keńester alady degen oıdamyn», dedi halyqaralyq uıym ókili.