Joǵarǵy Sotta qylmystyq jaza taǵaıyndaýǵa, avtorlyq jáne sabaqtas quqyqty qorǵaýǵa qatysty normatıvtik qaýlylardyń jobasy talqylandy
Otyrystyń kún tártibine sáıkes, avtorlyq jáne sabaqtas quqyqty qorǵaýǵa, qylmystyq jaza taǵaıyndaýǵa qatysty Joǵarǵy Sottyń eki normatıvtik qaýlysynyń jobasy talqylandy.
Alǵashqy jobany tanystyra kele, Joǵarǵy Sot sýdıasy Irına Kalashnıkova zııatkerlik qyzmet nysandaryn qorǵaýmen jáne qoldanýmen qatysty qatynastar azamattyq quqyqtyń normalarymen retteletindigin atap ótti. Avtorlyq quqyqty qorǵaý respýblıkanyń ekonomıkalyq ósiminiń turaqty jáne qarqyndy damýyn qamtamasyz etýdiń mańyzdy sharttarynyń biri retinde qarastyrylady jáne Qazaqstannyń DSU-ǵa kirýi qarsańynda aıryqsha ózekti bolyp tabylady.
Zııatkerlik menshik salasyndaǵy zańnamaǵa sońǵy jyldary engizilgen ózgerister avtorlyq jáne sabaqtas quqyqty qorǵaý týraly zań normalaryn sot tájirıbesinde durys qoldaný maqsatynda osy normatıvtik qaýlyny ázirleýge qajettilik týdyrdy. Joba avtorlyq quqyq salasyndaǵy halyqaralyq sharttardy naqtylaý, Internet jelisine týyndylardy zańsyz ornalastyrý faktilerin anyqtaý, avtorlyq jáne sabaqtas quqyqty buzatyn adamdardy aıqyndaý bóligi boıynsha tolyqtyrýlar engizýdi kózdeıdi. Avtorlyq kelisimniń sharttaryn aıtarlyqtaı buzý, ónimdi qaıta basyp nemese qaıta jazyp shyǵarý uǵymdary naqtylanady, týyndylar men (nemese) fonogrammalar danalarynyń kontrafaktiligi uǵymy, osy sanattaǵy ister boıynsha saraptama taǵaıyndaý jáne júrgizýdiń erekshelikteri aıqyndalady, avtorlyq jáne sabaqtas quqyqtar ıegerleriniń múddesin qorǵaýdy ujymdyq basqarý jónindegi uıymdardyń quqyǵyn rastaıtyn qujattardyń tizbesi belgilenedi.
Osy másele boıynsha qosalqy baıandamashy retinde Joǵarǵy Sottyń sýdıasy Aıgúl Qydyrbaeva men Astana qalalyq sotynyń sýdıasy Sara Jarmuhambetova sóz sóıledi.
Joǵarǵy Sottyń sýdıasy Meıram Janǵuttınov ekinshi normatıvtik qaýly jobasy týraly aıta kele, bul jobanyń jaza taǵaıyndaý máselesi boıynsha jańa qylmystyq jáne qylmystyq-protsestik zańnama normalaryn birizdi qoldanýdy qamtamasyz etý maqsatynda ázirlengendigin atap ótti. Jobada respýblıka zańnamasynda buryn-sońdy bolmaǵan birqatar jańa erejeler qamtylǵan. Bular, atap aıtqanda, qylmystyq teris qylyqqa, kelisimdik is júrgizýdegi jaza taǵaıyndaýǵa qatysty normalar. Qylmystyq jaza taǵaıyndaý máseleleri boıynsha sot praktıkasy burynyraqta eki normatıvtik qaýlyda kórsetilgen bolatyn.
Jańa Qylmystyq, Qylmystyq-protsestik jáne Qylmystyq atqarý kodeksteriniń qabyldanýyna baılanysty jaza taǵaıyndaý jónindegi jańa ınstıtýttardy túsindirý, jańa normatıvtik qaýly qabyldaýdyń qajettiligi týyndady. Onda jaýaptylyq pen jazany jeńildetetin jáne aýyrlatatyn mán-jaılar, neǵurlym qatań jaza taǵaıyndaý, kelisimdik is júrgizýdegi jaza t.b. sekildi uǵymdardyń máni egjeı-tegjeıli túsindirildi.
Qylmystyq kodekske «qylmystyq teris qylyq» dep atalatyn jańa zań uǵymynyń engizilýine baılanysty qylmystyq quqyqbuzýshylyqtardyń jıyntyǵy boıynsha jaza taǵaıyndaýǵa túsindirme berildi. Jobada sottardyń aıryqsha dep qandaı mán-jaılardy túsinýi tıistigine qatysty túsindirme berildi.
Osy másele boıynsha qosalqy baıandamashy retinde Joǵarǵy Sottyń sýdıasy Laýra Aǵybaeva men Astana qalalyq sotynyń sýdıasy Roza Jakýdına sóz sóıledi.
Normatıvtik qaýlylar jobalaryn ázirleý barysynda osy máseleler boıynsha sot isteri zerdelenip, sot tájirıbeleri saraptan ótkizildi, sondaı-aq jergilikti sottardan, ǴKK músheleri men múddeli memlekettik organdardyń usynystary men eskertýleri eskerildi.
