Joǵarǵy sotta elimizdiń sot júıesiniń jarty jyldyq qyzmeti qorytyndylandy
ASTANA. Shildeniń 9-y. QazAqparat /Aıdar Ospanalıev/ - Búgin Joǵarǵy sotta elimizdiń sot júıesiniń bıylǵy jarty jyldyq jumysy qorytyndylandy. Joǵarǵy sot sýdıalarynyń jalpy otyrysyna Sottar keńesiniń tóraǵasy Ońalsyn Jumabekov pen Joǵarǵy sot tóraǵasy Musabek Álimbekov qatysty.
Sot qyzmetiniń jyl basynan beri atqarǵan jumystary jóninde basqosýda baıandama jasaǵan Joǵarǵy sottyń Qylmystyq isterdi baqylaý alqasynyń tóraǵasy Aqyltaı Qasymovtyń aıtýynsha, 2010 jyldyń jarty jyldyǵynda Qylmystyq isterdi baqylaý alqasy men sýdıalar bıylǵy jyldyń qańtar aıynyń 1-inen bastap kúshine engen jańa zań negizinde jumys istedi. «Atalmysh zań talaptary boıynsha endi qylmystyq ister aýdandyq sottarda qaralady jáne atalmysh isterdi appelıatsııalyq jolmen qaıta qaraý múmkindigi qarastyrylǵan. Eger buryn appelıatsııalyq alqa músheleri alǵashqy sot satysynda kórsetilmegen málimetter men derekterdi nazarǵa almaıtyn bolsa, qazir olar osyndaı málimetterdiń barlyǵyn sot qyzmeti barysynda tolyq qoldana alady. Sondaı-aq appelıatsııalyq alqa músheleri osy jańa faktiler negizinde jańa sot aktisin engizýge de quqyly», dedi alqa tóraǵasy.
Onyń sózine qaraǵanda, sot tájirıbesinde aýdandyq sot shyǵarǵan aıyptaý úkiminiń kúshin joıyp, aıyptalǵan azamatty aqtap alý jaǵdaılary barshylyq. «Biraq olar óte az. Búginde elimizdiń sot organdary qyzmetiniń turaqtylyǵy jiti baqylaýda. Joǵarǵy sot
ár deńgeıdegi sot ókilderiniń qyzmetine baǵa beredi. Osy baǵytta daıyndalǵan statıstıkalyq málimetter sot organdary qyzmetiniń turaqtylyǵyn kórsetip otyr. Árıne, azdaǵan aýytqýshylyqtar bar. Olar qazir 0,2 paıyzdy qurap otyr. Bul - óte az kórsetkish. Oǵan isterdi jańa appelıatsııalyq tártippen qaraý jaǵdaıy sebep bolyp otyr, ıaǵnı atalmysh jaǵdaı aýdandyq sottardyń sheshimderin ózgertýge negiz bolyp otyrǵan basty sebepterdiń biri», dedi A.Qasymov.
Sondaı-aq ol sózinde kámeletke tolmaǵandardyń isin qaraıtyn arnaıy mamandandyrylǵan sot qyzmetiniń sapasy artyp kele jatqandyǵyn atap kórsetti.
