Joǵarǵy sotta bala tárbıesindegi daýlardy sheshý máselesi talqylandy
Otyrystyń kún tártibine sáıkes, Joǵarǵy Sottyń tórt normatıvtik qaýlysynyń jobasy talqylandy. Joǵarǵy Sottyń sýdıasy Záýre Keıkibasova «Sottardyń balalardy tárbıeleýge baılanysty daýlardy sheshý kezinde zańnamany qoldanýy týraly» normatıvtik qaýly jobasymen tanystyrdy.
«Biz «tárbıeleý» sózin tar maǵynada túsinbeýimiz kerek. Balalarǵa qatysty daýlardy sheshe otyryp, biz olardyń dúnıetanymy men bolashaǵyna ǵana emes, halqymyzdyń keleshegine de yqpal etemiz», - deıdi ol.
Záýre Keıkibasova qandaı jaǵdaılarda ata-ana quqyqtarynan shekteý jáne alıment óndirýden bas tartý sharasy qoldanylatynyn, ata-anasynyń biri turaqty turý úshin Qazaqstannyń sheginen tys ketetin balalardyń turǵylyqty jerin anyqtaý týraly isterdi qaraý kezinde týyndaıtyn keıbir máseleler týraly aıtyp berdi.
Al Joǵarǵy Sottyń sýdıasy Sara Jarmuhambetova «Sottardyń balanyń týý tegin anyqtaýǵa baılanysty isterdi qaraýy kezinde zańnamany qoldanýy týraly» normatıvtik qaýly jobasyn tilge tıek etti. Ol óz ata-anasyn bilý quqyǵy Balanyń quqyqtary týraly konventsııada bekitilgenin atap ótti. Bala óziniń bıologııalyq ata-anasyn bilýge, otbasynda turýǵa jáne tárbıelenýge quqyly. Sýdıa atap ótkendeı, er adamnyń ákeligin moıyndaý erikti tártipte balanyń anasynyń kelisiminsiz belgilenedi. Bul rette, anasy qaıtys bolǵan, ony áreket etýge qabiletsiz dep tanyǵan, onyń turǵylyqty jerin anyqtaý múmkin emes jáne ol ata-ana quqyqtarynan aıyrylǵan jaǵdaılarda qamqorshylyq jáne qorǵanshylyq organdarynyń kelisimin alý qajet.
Joǵarǵy Sottyń sýdıasy Laýra Aǵybaeva «Qylmystyq isterdi buıryqtyq is júrgizý tártibimen qaraý týraly» normatıvtik qaýlynyń jobasyn tanystyra kele jańa ınstıtýt - buıryqtyq is júrgizýdiń maqsaty, erekshelikteri týraly aıtyp berdi. Normatıvtik qaýly jobasy sotqa deıingi satyda jáne sotta isti qaraý kezinde buıryqtyq is júrgizýdi qoldaný normalaryn túsindirýden turady. L.Aǵybaeva atap ótkendeı,normatıvtik qaýlyny qabyldaý buıryqtyq is júrgizý sot praktıkasyndaǵy daýly máselelerdi sheshýge, praktıkada is júrgizýdiń osy túrin keń qoldanýǵa, protsesti jeńildetýge múmkindik berip, sýdıalarǵa, quqyq qorǵaý organdarynyń qyzmetkerlerine jáne buıryqtyq is júrgizýdi qoldaný boıynsha olardyń quqyqtaryn iske asyrýda azamattarǵa pármendi járdem kórsetedi.
Joǵarǵy Sottyń sýdıasy Asqar Smaılov «Ózderiniń qyzmetin zańnamany óreskel buza otyryp júzege asyratyn zańdy tulǵalardy taratýdaǵy sot tájirıbesi týraly» normatıvtik qaýlyǵa túzetýler engizý jobasyn usyndy. Qaýlyny ázirleý zańnamaǵa ózgerister engizýge baılanysty týyndap otyr.
