Joǵarǵy Sotta Ákimshilik protsestik kodekstiń jobasyn ázirleý boıynsha qurylǵan jumys tobynyń otyrysy ótti
Keńes jumysyna Joǵarǵy Sottyń sýdıalary men Departamenttiń jaýapty qyzmetkerleri qatysty.
Kodeks jobasy týraly aıta kele, A.Qydyrbaeva «Qazaqstan Respýblıkasynyń 2010 jyldan 2020 jylǵa deıingi kezeńge arnalǵan Quqyqtyq saıasat tujyrymdamasynda ákimshilik ádilet júıesin qurý qajettigi, ol qylmystyq jáne azamattyq sot isin júrgizýmen qatar, sot tóreligin júzege asyrýdyń tolyqqandy túrine aınalýy tıis» dep atap ótti.
Kodeksti ázirleý qajettigi týraly máseleni kótere kele, Joǵarǵy Sot sýdıasy Valerıı Nozdrın: «Óziniń tabıǵaty boıynsha ákimshilik is júrgizý - azamattar men uıymdardy memlekettik organdar men olardyń laýazymdy tulǵalarynyń quqyqqa qaıshy áreketterinen qorǵaıtyn ınstıtýt» ekenine toqtaldy.
ÁPK jobasy jarııa-quqyqtyq qatynastardan týyndaıtyn isterdi qaraıdy. Otyrysqa qatysýshylar ÁPK jobasyn ázirleý mundaı sanattaǵy isterde azamat, zańdy tulǵa nemese uıym bir jaǵynan talapker bolyp tabylatyndyǵymen, ekinshi jaǵynan, memlekettik basqarý organy atynan memleket bir tarap bolyp qatysatyndyǵymen baılanysty ekendigine aıryqsha nazar aýdardy. Aıtalyq, memlekettik basqarý organy bılik quzyretine ıe, ádette onyń zań apparaty bar, al talapkerdiń (azamattyń, zańdy tulǵanyń nemese uıymnyń) jaǵdaıyn memlekettik organmen teń dárejede dep aıta almaımyz. Bul qatynastar densaýlyq saqtaý, sáýlet jáne qurylys, jer qoldaný, órt qaýipsizdigi, salyq jınaý jáne kedendik retteý, baǵa qalyptastyrý, antımonopolııalyq retteý, energııamen qamtamasyz etý, memlekettik qyzmet kórsetý jáne t.b. zańnamanyń kóptegen túrlerimen retteledi. Sondyqtan basqarý organy atynan memlekettiń qyzmet ereksheligi men mańyzdylyǵyn eskere otyryp, mundaı sanattaǵy isterdi qaraýdyń protsestik tártibin retteıtin normatıvtik quqyqtyq aktini ázirleý qajet. Bul azamattyń nemese zańdy tulǵanyń quqyqtary men zańdy múddelerin sotta qorǵaýǵa kepildik beredi.
Otyrysty qorytyndylaı kele, A.Qydyrbaeva jumys toby músheleriniń aldyna ÁPK jobasynyń normalaryn múddeli organdarmen talqylaý qajettigi týraly birqatar mindetter júktedi.
