Joǵarǵy Sotta 1 mamyr - Qazaqstan halqynyń birligi kúni merekesine arnalǵan saltanatty jıyn ótti (FOTO)
Keshe, 30 sáýirde bolǵan is-sharaǵa Joǵarǵy Sot Tóraǵasy Qaırat Mámı, qadaǵalaýshy sot alqalarynyń tóraǵalary men sot júıesiniń ardagerleri, sýdıalar men Joǵarǵy Sot Apparatynyń qyzmetkerleri qatysty. Saltanatty sharaǵa qonaq retinde Qazaqstan halqy Assambleıasy Tóraǵasynyń orynbasary - Hatshylyq meńgerýshisi Eraly Toǵjanov, Konstıtýtsııalyq Keńestiń Tóraǵasy Igor Rogov, Qazaqstan halqy Assambleıasynan Parlament Májilisine saılanǵan depýtattar shaqyryldy.
Jıynnyń aldynda uıymdastyrylǵan Qazaqstan halqy dostyǵynyń festıvaline Joǵarǵy Sot Apparatynyń qyzmetkerleri belsene atsalysty. Festıval sheńberinde Apparattyń árbir qurylymdyq bólimshesi Qazaqstanda turatyn etnostardyń mádenıeti men salt-dástúriniń ozyq úlgilerin kórsetip, mýzykasyn oryndap, ulttyq taǵamdaryn kópshilik nazaryna usyndy.
Saltanatty jıyndy ashqan Q. Mámı qazaqstandyqtar úshin 1 mamyr merekesiniń mańyzdylyǵyna toqtalyp, Qazaqstan halqynyń birligin saqtaý men nyǵaıtýda Memleket basshysynyń róli aıryqsha ekenin atap ótti.
«Táýelsiz Qazaqstannyń barlyq tabystary men jetistikterine kóp jaǵdaıda elimizdegi beıbitshilik pen kelisimniń arqasynda qol jetkizdik. Búginde respýblıkamyzdaǵy sottarda 28 etnos ókilderi jemisti qyzmet atqarýda. Sottar tarapynan jyl saıyn bir mıllıonnan astam istiń qaralýy, halyq seniminiń arta túsýi qazaqstandyq sot tóreliginiń tıimdi kórsetkishi bolyp sanalady», - dedi óz sózinde Joǵarǵy Sot Tóraǵasy.
Saltanatty jıynda sóz alǵan Eraly Toǵjanov jınalǵan qaýymdy merekemen quttyqtaı otyryp, «Qazaqstan birligi kúnine arnalǵan saltanatty is-sharany memlekettik mekemeler arasynda alǵash bolyp Joǵarǵy Sot ujymy búgin joǵary deńgeıde ótkizdi. Barlyǵyńyzdy osynaý is-sharanyń uıymshyldyqpen ótýimen jáne merekemen quttyqtaımyn» deı kelip, Joǵarǵy Sot Tóraǵasy Qaırat Mámı men Konstıtýtsııalyq Keńes Tóraǵasy Igor Rogovqa «Qazaqstan halqy Assambleıasyna 20 jyl» mereıtoılyq medalin tabystady.
Sondaı-aq, Joǵarǵy Sottyń birqatar sýdıalary Qazaqstan Respýblıkasynyń Prezıdenti - Qazaqstan halqy Assambleıasy Tóraǵasy atynan mereıtoılyq medaldarmen, Qurmet gramotalarymen jáne Alǵys hattarmen marapattaldy. Buǵan qosa, respýblıkamyzdyń barlyq óńirindegi 45 sýdıa jáne otstavkadaǵy 11 sýdıa dál osyndaı marapattarǵa ıe boldy.
Joǵarǵy Sot Tóraǵasynyń Ókimimen Qazaqstan halqynyń birligi kúnine oraı jáne Uly Otan soǵysyndaǵy Jeńistiń 70 jyldyǵy qarsańynda respýblıkadaǵy 70-ke jýyq sýdıa, Uly Otan soǵysynyń ardagerleri, tyl eńbekkerleri men otstavkadaǵy sýdıalar vedomstvolyq medaldarmen jáne arnaıy tósbelgilermen marapattaldy. Atalǵan nagradalar óńirlerge jiberildi jáne marapat ıelerine saltanatty túrde tapsyrylatyn bolady.
Іs-shara sońy merekelik kontsertke ulasty.
