Joǵarǵy Sotqa jańa 32 sýdıa taǵaıyndalady

ASTANA. QazAqparat - Búgin Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy bolyp ótti. Onda QR Joǵarǵy Sotynyń sýdıalary qyzmetine kandıdattar máselesi qaraldy. Atap aıtqanda, QR Prezıdentiniń usynýymen Joǵarǵy Sot quramyna 32 jańa sýdıanyń kandıdatýrasy talqylanyp otyr. Endi bul másele palatanyń jalpy otyrysyna shyǵarylatyn bolady.

Komıtet senatorlary otyrys barysynda sýdıa laýazymyna kandıdattardyń ómirbaıandarymen tanysyp, olardyń kásibı daıyndyǵyna, qyzmettik deńgeılerine qatysty saýaldar qoıdy. QR Joǵarǵy Sotynyń ókili Abaı Rahmetýlınniń aıtýynsha, usynylyp otyrǵan kandıdattardyń barlyǵy - QR Joǵarǵy Sotynyń jalpy otyrysynda eń joǵary daýysqa ıe bolǵandar. «Bul rette Joǵarǵy Sot kandıdattardy irikteýde barlyq máselelerge jan-jaqty qarady. Atap aıtqanda, osy 32 kandıdattyń genderlik quramy da eskerildi, máselen kandıdattardyń - 17-si er azamat (53 paıyz) jáne 15-i áıelderden (47 paıyz) turady. Kandıdattardyń ortasha jasy - 48 jas, sot salasyndaǵy ortasha jumys ótilderi 18 jyldy quraıdy», - dedi A.Rahmetýlın. Onyń aıtýyna qaraǵanda, sýdıa qyzmetine árbir kandıdat jiti tekserilip, árbireýine jeke ister tigilgen. QR Joǵarǵy Sotynyń alqasymen de tikeleı qosymsha tekserýler júzege asqan. Aıta keterligi, búgingi tańda Joǵarǵy Sot kadr rezervi 90 kandıdatqa tolyqqan kórinedi. Talqylaýdan soń, komıtet músheleri atalǵan máseleni aldaǵy jalpy otyrysqa shyǵarý týraly sheshim qabyldady.