Joǵarǵy sotqa sýdıalar qandaı shaǵym jasaıdy
«Sýdıalardyń táýelsizdigi boıynsha úlken jumys júrgizildi. Biraq, sýdıalardan maǵan keletin usynystarda birqatar júıeli problemalardy ashyp kórsetedi. Qazir kópshiligi jasyryn emes, ashyq jazady. Barlyǵy da biraýyzdan sýdıalar tóraǵaǵa táýeldi deıdi. Dál solar kimdi ósirý kerektigin, kimdi jazalaý qajettigin, al kimdi kótermeleýdi sheshedi. Olarda kez kelgen sýdıany tekserý, aktileriniń kúshin joıý syndy bılik bar. Biz muny óte jaqsy bilemiz. Sýdıalar, tipti bıznes qoǵamdastyǵy da muny jaqsy biledi», - dedi Joǵarǵy sot tóraǵasy.
Onyń atap ótýinshe, sýdıalardyń jaýapkershiligi sheshiletin nemese basqa laýazymǵa aýysatyn kezde tóraǵa beretin minezdeme de qysym jasaýdyń quralyna aınalǵan.
«Iá, tóralqa bar. Biraq, tóralqa sot tóraǵasynyń ustanymyna qaramastan sheshim shyǵarǵan birde bir jaǵdaı joq», - dedi ol.
Jaqyp Asanovtyń aıtýynsha, kóńilden shyqpaǵan sýdıaǵa kúrdeli isterdi úıip tastap, odan keıin narazylyq bildirý derekteri de bar. Sonymen qatar ol óńirden hat jazǵan advokattyń oblystyq sottardyń zańsyz úkimderge kóz juma qaraıtyndyǵyn, munyń sebebi reıtıng qulaý ekendigin ashyq aıtqanyn atap ótti.
«Óıtkeni, tóraǵa úshin bul eń bastysy. Mine, zańger osynaý jarysty doǵarýdy surap otyr. Sýdıalardyń táýelsizdigi problemasy bizdiń júıemizdiń ishinde de tereńdep ketkeni me? Jalpy, Memleket basshysy jumys isteýimiz úshin barlyq jaǵdaımen qamtamasyz etti. Biz óz ishimizde problema jasap otyrmyz. Baǵalaý júıesine qaraıyqshy. Ol sýdıany kórsetkishtiń sońyna júgirtpeýi tıis. Sot ádildigin reıtıngke qurban etýge bolmaıdy», - dedi Jaqyp Asanov.
Keńeıtilgen keńes barysynda Jaqyp Asanov daýlasýshylardy sotqa jetkizbeı tatýlastyratyn organ qurýdy usyndy.
Sonymen qatar ol oblystyq sottardyń Joǵarǵy sotqa jiberetin statıstıkalarynda jalǵan derekter kóp ekendigin ashyq aıtty.
