Joǵarǵy Sot janynan Halyqaralyq keńes pen mamandandyrylǵan sot alqasy qurylady

ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir konstıtýtsııalyq zańdaryna azamattyq protsestik zańnamany jetildirý boıynsha ózgerister men tolyqtyrýlar engizý týraly» QR zańyn qabyldady.

Qujat boıynsha «Qazaqstan Respýblıkasyndaǵy saılaý týraly», «Sot júıesi men sýdıalardyń mártebesi týraly» konstıtýtsııalyq zań normalaryn Azamattyq protsestik kodeks jobasyna sáıkes keltiretin túzetýler engizilmek.

«Atap aıtqanda, saılaý týraly zańǵa Ortalyq saılaý komıssııasymen kelisilgen 8 túzetý engizilip otyr. Bul rette kodeks jobasynda azamattardyń saılaý quqyqtary boıynsha shaǵym jasaý ınstıtýty engiziletindikten, aýdandyq sottar sheshimderiniń túpkilikti bolyp tabylatyndyǵy týraly ereje alynyp tastalady. Sonymen qatar, saılaý komıssııasynyń saılaýshylar tizimine qosý, alyp tastaý jáne onymen tanystyrý týraly tizimge ózgeris engizý sekildi áreketterine shaǵymdaný týraly aryzdardy sot kelip túsken kúni qaraıtyn bolady. Sot sheshimine shaǵymdanýǵa da bolady»,- dedi QR Joǵarǵy Sotynyń sýdıasy Ulbolsyn Súleımenova.

Onyń aıtýynsha, zań jobasymen Joǵarǵy Sottyń quziretin keńeıtetin túzetýler de engizilip otyr. Bul rette Joǵarǵy Sottyń qaraýyna Ortalyq saılaý komıssııasynyń sheshimderine jáne áreketterine daý aıtýǵa qatysty barlyq ister jatatyn bolady.

Budan bólek, Joǵarǵy Sotta mamandandyrylǵan sot alqasyn qurýdy kózdeıtin normalar da qamtylyp otyr. Jańadan qurylatyn alqanyń quzyretine iri ınvestorlardyń daýlaryn birinshi satyda qaraý engiziledi. Sonymen qatar, alqanyń sýdıalary Ortalyq saılaý komıssııasynyń is-áreketterine shaǵymdanǵan isterdi de qaraıtyn bolady. «Sonymen birge, QR Joǵarǵy Soty janynan halyqaralyq keńes qurý da qarastyrylady. Bul jańa konsýltatıvtik organ bolyp tabylady. Al sheteldik jáne otandyq mamandar qatysatyn ol halyqaralyq keńestiń ınvestıtsııalyq daýlardy qaraýdaǵy konsýltatsııalary usynym sıpatynda bolady», - dedi Joǵarǵy Sot sýdıasy.

Budan bólek, zań jobasymen Elbasy aıqyndaǵan «100 naqty qadam» Ult josparyn oryndaýǵa baǵyttalǵan túzetýler de engizilgen. «Atap aıtqanda, azamattardyń sot tóreligine qol jetimdiligin ońaılatý úshin sot júıesi satylaryn ońtaılandyrý maqsatynda bes satyly sot tóreligi júıesin úsh deńgeıli júıege (birinshi, appellıatsııalyq jáne kassatsııalyq satylar) kóshýge qatysty túzetýler qrastyrylǵan», - dedi U. Súleımenova.

Parlament qabyldaǵan zań Memleket basshysynyń qol qoıýyna joldanady.