Joǵarǵy sot, jańa vokzal jáne Nazarbaev Ýnıversıtetine «jarylǵysh zat» qoıyldy
ASTANA. QazAqparat - Astanada Joǵarǵy soty men «Nurly jol» jańa temirjol vokzaly ǵımarattaryna qoıylǵan bomba týraly qońyraý túsip, adamdar evakýatsııalandy, dep habarlaıdy QazAqparat tilshisi.
«12 saǵat 16 mınýtta belgisiz adam habarlasyp, «Nurly jol» temirjol vokzalyna jarylǵysh zat qoıylǵanyn aıtty. Dál sondaı qońyraý 12 saǵat 30 mınýtta qaıtalanyp, Joǵarǵy sot ǵımaratynda jarylǵysh zat bar ekenin habarlaǵan. 13 saǵat 30 mınýtta belgisiz adam «Nazarbaev Ýnıversıtetine» bomba bar dep habarlasty», - dep túsindirdi Astana ІІD baspasóz qyzmeti.
Atalǵan habarlamalar boıynsha azamattardyń qaýipsizdigi úshin barlyq shara júrgizildi.
«Kórsetilgen oryndarǵa barlyq qyzmetter attandy. Oqıǵa oryndarynda jedel áreket etý qyzmetteri jumys istep jatyr», - dep atap ótti polıtseıler.
«QazAqparat» HAA tilshisimen suhbattasqan ІІD baspasóz qyzmetiniń ókili kúdiktiniń ustalǵanyn habarlady.
«Polıtseılerdiń jedel áreket etýi arqyly kúdiktiniń 25 jastaǵy er adam ekeni anyqtalyp, ustaldy. QR Qylmystyq Kodeksiniń 273-baby boıynsha sotqa deıingi tergeý amaldary júrip jatyr. Bul bap qylmyskerdi 6 jylǵa deıin bas bostandyǵynan aıyrýdy kózdeıdi», - deıdi ІІD ókili.
