Joǵarǵy sot tórt jyl buryn sottalǵan shekarashyny aqtap shyqty
QR Joǵarǵy sotynyń baspasóz qyzmetinen málim etkendeı, tergeý organdary 2014 jyly «Qaplanbek» shekaralyq baqylaý pýnktiniń aǵa baqylaýshysy qyzmetindegi 27 jastaǵy Arman Sársenbaevty jaýapqa tartqan. Tergeý nusqasyna sáıkes, ol óziniń laýazymyn asyra paıdalana otyryp, syıaqyǵa Ózbekstannan Qazaqstan jerine adamdar ótkizgen-mys.
«2014 jyldyń 19 maýsymynda qylmystyq ister jónindegi mamandandyrylǵan áskerı sot Arman Sársenbaevty para alǵany úshin kináli dep taýyp, ony 5 jyl merzimge bas bostandyǵynan aıyrý týraly sheshim shyǵarǵan. Sonymen qatar, ol memlekettik organdarda qyzmet etýden 5 jylǵa shettelgen. Apellıatsııalyq sot sottalýshyǵa qatysty sheshimdi ózgerissiz qaldyrǵan. Al QR Áskerı soty onyń jazasyn 1 jyl 3 aıǵa deıin qysqartqan», - delingen habarlamada.
Bul sheshimmen kelispegen sottalýshy Joǵarǵy sotqa júgingen. Ol óz shaǵymynda aıyptaý tarapy tek kýágerlerdiń rastalmaǵan jaýabyna súıengenin alǵa tartqan. Tipti kýágerler sottalýshyny tanymaǵan. Sonymen birge, Ózbekstan azamattaryn shekaradan zańsyz ótkizý týraly telefon áńgimeleriniń stenagrammasy is materıaldarynyń arasynda bolmaǵan. Al bul aıyptaýdyń negizi retinde alynǵan bolatyn.
«QR Joǵarǵy sotynyń qylmystyq ister jónindegi sot alqasy A.Sársenbaevtyń dáleldenbegen jáne qarama-qaıshy kýágerlik jaýaptarǵa súıenip sottalýyn negizsiz dep tanydy. Aıyptaý tarapynyń turaqty túrde telefon arqyly tildesý bolǵanyn alǵa tartqan ýáji dáleldiń joqtyǵynan alynyp tastaldy», - delingen habarlamada.
Sonymen qatar, A.Sársenbaevtyń aqshalaı syıaqy alǵany týraly dáleldiń joqtyǵyna mańyz berilgen.
Joǵarǵy sot atalǵan materıaldardy esepke ala otyryp, Arman Sársenbaevty tolyq aqtady. Jazyqsyz sottalǵan jigitke qylmystyq qýdalaý organynyń zańsyz áreketi saldarynan kelgen zııan men shyǵyndy ótep alýǵa quqyq berildi.
