Joǵarǵy Sot tóraǵasy azamattardyń jańa jyldaǵy alǵashqy legin qabyldady
Bul týraly Joǵarǵy Sottyń baspasóz qyzmetinen habarlandy.
Azamattardy qabyldaý barysynda toǵyz ótinish jasaýshynyń máselesi negizinen, sot aktilerine shaǵymdanýǵa qatysty boldy. Máselen, Astana qalasynyń turǵyny G. Galınanyń ókili uzaq jyldar boıy ishimdikke salynǵan ulynyń adam óltirýine qatysty sot úkimin joıýdy suraıdy. Bul rette advokattyń pikirinshe, is obektıvti qaralmaǵan, sot saraptamanyń nátıjelerin qaperge almaǵan, sondaı aq sottalýshynyń jarymjan bolǵandyqtan kisi óltirýge shamasy kelmeıtinine nazar aýdarylmaǵan. Al Almaty oblysynyń 70 jastaǵy turǵyny M. Qanapııa óziniń atyna jabylǵan jalany aqtap alǵysy keletinin aıtqan. Orman sharýashylyǵynyń burynǵy dırektorynyń aıtýynsha, 20 jyl buryn ony óziniń jumysshylarynyń jalaqysyn jymqyrdy, zańsyz úı saldy dep negizsiz aıyptaǵan.
Al Mańǵystaý oblysynan kelgen egde áıel óz ulyna kómek kórsetýdi suraıdy. Zeınetker keıýananyń aıtýynsha, balasyn bir alaıaq áıel aldap-arbap nesıe alyp alǵan, endi bank odan iri mólsherde qarajat talap etýde eken.
Budan bólek, kelýshiler qatarynda elimizdegi bir iri banktiń basqarma orynbasary da bolǵan. Kassatsııalyq sot ınstantsııasy bankti shaǵymdanýshynyń shotyna 300 mıllıon teńge óndirip berýge mindettegen. Qarjy mekemesiniń ókili bundaı sot sheshimin negizsiz sanaıdy jáne Joǵarǵy Sot tóraǵasynan qabyldanǵan sot aktisin toqtatýdy suraıdy.
Azamattardy qabyldaýdan soń tóraǵa B.Beknazarov Joǵarǵy sottyń azamattyq ister jónindegi qadaǵalaý sot alqasynyń tóraǵasyna jáne jaýapty qyzmetkerlerge kelýshilerdiń shaǵymdaryna qatysty olardy jete zerdeleý jóninde naqty tapsyrmalar júktedi. Solardyń nátıjesine oraı, tıisti sharalar qabyldaýdy tapsyrdy.
